Assammik arsartartut siunissaannik isumannaarsaasut
Tamanna pissutigalugu kattuffik siunissaq ungasinnerusoq eqqarsaatigisariaqalersimavaa, inuusuttullu soqutiginnilerseqqinnissaannut pilersaarusiortariaqalersimalluni. Streethandball aaqqiissutissat ilagaat, aamma ukioqqortussuseq najoqqutaralugu sungiusaasarneq aamma aaqqissutissaasinnaavoq. Peqatigitillugu pikkorinnerpaat ineriartorteqqinnissaat aamma pimoorullugu sulissutiginiarneqarpoq.
-Atituumik suliniuteqaatigaluta pikkorinnerpaat sulissuteqarfiginiarlugit qinersimavarput. Taakku ingerlaqatigiissinneqakutsoorsinnaapput, aamma ataasiinnarmik sulissuteqartoqarsinnaanngilaq. Qullasinnerpaatigut angusanik pitsaasunik takutitsisinnaanngikkutta atituumik suliniuteqarnissatsinnut aningaasanik nassaarnissarput ajornakusoortupilussuussaaq, nunanut allanut unammisartut sungiusaasuat Niels Møller, nunanut allanut unammisartunik Nunatsinni najugaqartunik sungiusaaniarluni ulluni makkunani Nunatsinniittoq oqaluttuarpoq.
Niels Møllerip suliassarigaluarpaa nunanut allanut unammisartut angutitaannut sungiusaasuunissaq, Nunatsinnili assammik arsarnerup siunissaata pilersaarusiorneqarnissaa aamma peqataaffigisariaqartutut isigisimavaa. Tamanna Kalaallit Nunaanni Assammik Arsartartut Kattuffianni iluarisimaarneqartupilussuuvoq.
-Niels Møllerip inuusuttut pillugit suliniuteqarnitsinnut peqataanissaa aamma uagut tungitsinnit kissaatigisimavarput. Ilaatigut taassuma streethandballimut ilisaritippaatigut, suliniarneralu maanna annertuumik suliniuteqarnitsinnut sunniuteqarsimavoq. Assammik arsartartut atitunerusumik inissisimasut qullasinnerpaallu akornanni attaviliisuuvoq, Elise Bruun GHF-ip siulersuisuineersoq knr.gl-imut oqaluttuarpoq.
