Assammik arsartartussat sungiusarneqarput

Inussivik meeqqanik 37-nik assammik sapaatip akunnerani matumani arsarfiullualereerpoq. Meeqqat peqataasut aasami atuanngiffeqarnerminni assammik arsarlunisungiusarnermi peqataanertik ikinngutitaartorfigaat, neriunartoqarporlu nunanut allanutm siunissami unammisartunngorsinnaanissaat.
juulip 10-at 2012 13:26

Timersortarfimmi niviarsiaqqat nukappiaqqallu nipaat nuannaartut tusarsaapput. Taakkulu inersimasunik arfineq pingasunit sungiusarneqarput. Sungiusaasunut ilaapput, nunanut allanut unammisartoq Jakob Larsen aamma danskit nunanut allanut unammisartuat Kamilla Kristiansen.

- Meeqqat mikinerit  meeqqanit anginernit ukioq manna amerlanerupput. Tamannalu nuannaarutigaarput, misilittagaqarfigereerparpummi meeqqat mikineranniit assammik arsarnissamik soqutiginnilersinnaaneri. Peqataasut amerlanersaat assammik arsarlutik timersortanngillat, assammillu aasareerpat assammik arsartalersinnaanissaat angorusunnarpoq, Lillian Bjerge Nuummi Håndboldskolemik ukiuni arlalinni aaqqissueqataasartoq taama oqaluttuarpoq.

Ukiormanna Håndboldskoleqarnissaa naliginnaasumik kingusinnerumik aallartippoq. Jakob Larsenip Amerikap nunavittaani VM-imut angunniunnermi  Argentinami pisumi unammeqataanera kinguaattoorutaalluni. Pisarnermiilli kingusinnerugaluartoq peqataasut ilaannit nuannarineqarluarpoq.

- Peqataasut amerlasuut aasap naalernerani aatsaat sunngiffeqareerluta aatsaat aallartussaavugut. Maanilu suliassaaleqinngivippugut, ullullu tamaasa ilikkagartarpugut. Tunuarsimaarata sassarsinnaanissatsinnut aamma ilinniarparput, tamannalu arsarluarsinnaanissatsinnut iluaqutaassaaq. Ulloq naallugu assammik arsarluni sammisaqarneq nuanneqaaq, Paninnguaq Lynge assammik arsartartoq peqataasorlu taama oqaluttuarpoq.