Assammik arsarnermi VM kalaallit isaannik isigalugu

Kalaallit arnartaasa nunat soorlu Uruguay aamma Argentina ajugaaffigisinnaasariaqarpaat 2013-mi VM-imut anngussinnaaniassagunik. Qallunaat arnartaasa amerika kujallermiunut unamminerisa takutippaat kalaallit arnataasa sungiusarnerminni suut pimooruttariaqarneraat.

Assammik arsarluni Brasiliami VM-qarnerani Amerika kujallermiut Danmarkimut unamminnerminni ajorsarujussuartarput. Danmarkip Uruguay 36-10-mik aamma Argentina 31-13-mik ajugaaffigai.

Unamminerit taakku kalaallit arnartaasa sungiusaasuata Jakob Andreassenip soqutigalugit isiginnaarsimavai. Tassami kalaallit arnartaasa Argentina aamma Uruguay ajugaaffigisinnaasariaqarpaat 2013-mi VM-imut anngusinnaaniassagunik.

- Urujuay aamma Argentina panamerikamiusut arsariaaseqarput. Pilersaarusiugaarpalaanngitsumik arsartarput tassanngaannaq pisoqarfiusinnaasartunik. Naak Danmarkimut ajorsarujussuaraluarlutik qasujaallisarluarsimapput, Jakob Andreassen KNR-imut oqarpoq.

Kalaallit arnartaat 2001-mi VM-imut peqataapput tamatumali kingorna inersimasut uninngapajaarsimallutik. Maanna Assammik Arsartartut Kattuffiat aalajangerput arnat pimoorussamik aalluteqqilerniarlugit. Panamerikamiut pissartanngorniunnerannut anngunniuttussanngorput unamminerillu taakku novembarimi 2012-mi pissapput.

Taamaammat kalaallit arnartaasa iluaqutigisinnaalluarpaat Uruguayip aamma Argentinap Danmark puljeqatigimmassuk. Taamaasillutik kalaallit unammisartut siunissami unammiumaagassatik tv-mi isiginnaarsinnaasimavaat.

- Maanna takusinnaavarput kalaallit unammisartut timikkut nukittorsarneq annertuumik ingerlattariaqaraat. Amerika kujallermiut kalaallinit nukittunerugunarput. Kisianni uagut arsarnermi paasinnittaatsikkut teknikkikkullu Uruguay-imit Argentinamillu arsartuginneruvugut. Kisianni suli nukittunerusariaqarpugut Amerika kujallermiut ajugaaffigisinnaassagutsigit, Jakob Andreassen oqarpoq.

Taamatut ilisimatinneqassapput kalaallit unammisartut februaarip qeqqani Danmarkimi sungiusaqatigiilerunik.

Argentina aamma Uruguay ingerlaqqinnavianngillat, kisianni Brasilien ingerlaqqissinnaassagunarpoq.

- Brasiliamiut angusarissaassappat kalaallit iluaquserneqarsinnaapput. Tullianik VM-qarnissaanut Panamerikamiunut inissat sisamaaratarsimapput tamannalu uagut ajorinngilluinnarparput, Jakob Andreassen oqarpoq.

Ualimut Danmarkip Kroatia unammissavaat. Unammineq taanna KNR-TV-kkut toqqaannartumik aallakaatinneqassaaq nalunaaqutaq 16.45

Sisamanngorpat Elfenbenskysten Danmarkip unammissavaat Sverige-lu tallimanngorpat unammissallugu. Unamminerit taakku aamma KNR-TV-mi toqqaannartumik aallakaatinneqassapput.

Aallakaatitassat tulleriiaarnerat takusinnaavat qulaani TV toorlugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat