Assammik arsarneq: Ukiut qulit ineriartortitsineq sapangeqqajaavaat

Arnat assammik arsarnermi nuna tamakkerlugu sungiusaasuat Jakob Andreassen isumaqarpoq GHFip siulersuisuisa neriorsuutsik tunukkaat. Tassami siorna ataatsimeersuarnermi aalajangiunneqarpoq arnat VM-mut anngunniutissastut, ukiorli qaangiutinngitsoq GHF allatut isummeqqajaalerpoq.

Arnat assammik arsarnermi nunanut allanut unammisartoqarnersut qularnarsivoq. Tassami VM-mut peqataanissamut anngunniunnissaat taamaateqqajaavoq, naak GHF siorna ataatsimeersuarmat arnat angutillu tamarmik nunanut allanut unammisartoqassasut aalajangiunneqaraluartoq. Maanna GHFip siunnerfik ukiunik qulinik pisoqaassusilik uterfigeqqajaavaa oqarlutik piukkunnartunik ineriartortitsisoqassasoq.

- Taama pisoqassappat piukkunnartunik 2003 aallarnerfigalugu ineriartitsisimaneq annaaneqariaannaasoq, arnat nunat tamakkerlugu sungiusaasuat Jakob Andreassen oqarpoq.

Piukkunnaatilinnut ineriartortitsineq 2003-mi aallartinneqarpoq inuusuttuni arnani angutinilu nunanut allanut unammisartut panamerikamiut pissartanngorniunnerannut peqataatinneqarmata. Tamatuma kingorna kalaallit arnartaat U-16-it, U-18-it aamma U-21 panamerikami pissartanngorniunneranni peqataasarsimapput.

- Taamaattumik isumaqatiginngivippara GHF-mi siulersuisut oqassappata piukkunnartoqanngitsoq. Arnat pikkorissut tallimat arfinillit Danmarkimi divisionini maanna ingerlalluarput. Aamma piukkunarluartut arlalissuit Kalaallit Nunaanniipput ukiut qulit kingulliit piukkunnartunik ineriartortitsinermut peqataasimasut, Jakob Andreassen oqarpoq.

Unammisartut arlalissuit nalunaaquttap akunnerpassuini sungiusarsimapput neriuutigalugu inersimasuni panamerikamiut pissartanngorniunnerannut peqataasinnaassallutik. Taamaammat tusakkat kingulliit unammisartut pakatsissutigaat.

- Isumaqarpunga maanna unammisartunut nassuiaatissaaleqisorujussuanngorlunga. Tassami taaneqareersutut VM-mi unamminissamut ilimasutsinneqalersimapput nalunaaquttallu akunnerpassuit atorlugit sungiusarsimallutik. Pakatsisitsissagutta piukkunnartorpassuit sapangeriaannaavagut. Taama pisoqassappat ukiut qulit kingulliit piukkunnaatilinnik ineriartortitsisimaneq sapangeriaannaavarput arnat VM-mut anngunniukkiartinnagit piukkunnaatilinnik ineriartortitsineq nutaaq aallartinneqassappat, Jakob Andreassen oqarpoq.

Taanna isumaqarpoq GHFip arnat tungaannut tutsuiginassusaa uppeqqajaalersoq. Arnammi 2001-miilli pisortatigoortumik nunanut allanut unammisimanngillat taamalu qanittumi pisoqarnissaa ilimananngikkallarluni.

Jakob Andreassenip erseqqissarpaa angutit nunanut allanut unammisartut aallunneqarnerat apeqqusersunngikkini

Arnalli suli suli puiguinneqanngillat. GHF maanna misissuivoq arnat inersimasut unamminissaannut periarfissanik. GHFip siulittaasua Boas Møller taama KNR-mut ilisimatitsivoq.

Qanorpiaq pisoqarnissaa pillugu ullut arlaqanngitsut qaangiuppata nalunaaruteqarsinnaallutik GHFimiit ilisimatitsipput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat