Assammik arsarneq Tunumi pilerisaarutigineqalersoq
GHF 2012-ip naalernerani workshoppertitsinermi streethandballip siunissami aallunneqarnerunissaanik aalajangerpoq. Arsarneq taanna, assammik arsarnermut nalinginnaasumut timersortarfissuarmilu ingerlanneqaertartumut assingusupilussuuvoq, arsalli aqitsut ajuuffissallu nuunneqarsinnaasut atorneqarmata sumiluunniit ingerlanneqarsinnaavoq.
-Ajuuffissanik 50-inik arsanillu 500-nik pisiniartussanngorpugut, taamaammat streethandballip aallunnissaanik oqaratta pimoorussinerput timitalerneqalersoq takuneqarsinnaavoq. Sumiiffinni assammik arsarnermik nalinginnaasumik ingerlatsinissamut inissaqartitsiffiunngitsuni timersornermik aallartitsinissatsinnut periarfissiissaaq. Inissaqarfiusumi timersorsinnaalissaagut, timersuutillu nunamut tamarmut siaruaannissaanut periarfissanik allarluinnarnik tunissavaatigut, Elise Bruun knr.gl-imut oqaluttuarpoq.
Sumiiffit streethandballimik ilisarititsiffiusussat ilagaat Tasiilaq. Tassani assammik arsarneq ileqquusumik aallunneqanngilaq, illoqarfiulli inuusuttaasa timersuut, timersuut assingusoq inissamillu pisariaqartitsivallaanngitsoq aqqutigalugu, misilittaavigisinnaassavaat.
-Tasiilami atuarfik pisortaalu isumaqatigiissuteqarfigaagut, aallartiffissattalu siulliit ilagissavaat. Tasiilami naatsorsuutigisatsinnit suli annerusumik angusaqarsinnaassalluta ilimagaara, atortussallu nutaat pigilernerisigut assammik arsarnerup nuna tamakkerlugu pimoorussamik ingerlanneqalernissaanik misiliisinnaavugut. Atituumik suliniuteqarnerput naggataatigut nunanut allanut unammisartoqarnikkut periarfissanik pitsaanerusunik pilersitsissaaq, Niels Møller, nunanut allanut unammisartut angutitaasa sungiusaasuat naqissusiivoq.
