Assammik arsarneq: Lykke Europa Leaguemi arsarluartoq
Nunatsinni arsammik arsarnermi oqaluttuarisaanermut ilannguttumik ippassaq pisoqarpoq.
Tassanimi Lykke Frank Hansen Nuummeersoq kalaallini arnani siullersaalluni Europa Leaguemi unammeqataavoq klubbini Nykøbing Falster Håndbold unammeqatigigamiuk.
Paris 92-mulli unamminermi peqataaginnanngilaq. Talerpia sakkortoqisoq ataasiarluni isertitsissutigineqarpoq.
- Isertitsilluni nuannertuaannarpoq. Kisianni kikkut unamminerlugit eqqarsaatigivallaanngilara iligiittut arsarnerput eqqarsaatigineruakku, Lykke Frank Hansen oqarpoq.
Nykøbing Falster Håndbold Paris 92-mut maanna aappassaa ajorsarpoq taamalu unammersuarnermi European Leaguemi ingerlaqqittussaajunnaarluni.
Pokalinnanniunnermi final 4
Taamaattoq Lykke Frank Hansenimut misigisaq pikkunarpoq kalaallini arnani siullersaalluni klubbikkaarumik Europami unammeqataagami.
- Assut kalaalersaallunga kakkalluartunut Parisimut unamminermi peqataasinnaagama, Lykke Frank Hansen oqarpoq.
Europamili klubbinut allanut ukioq unammiffiusoq maanna unammeqqissanngillat. European Leaguemi ingerlaqqinnissamut anngunniulluni Paris 92 unammineqarpoq. Unamminermi siullermi novemberip 15-at Nykøbing Falster Håndbold Parisimut 16-28-mik arsarpoq sapaammilu unammeqqinnerminni 26-28-mik ajorsarlutik.
Nykøbing Falster Håndbold januarip aappaat unammeqqissaaq. Maanna arnat Danmarkimi EM-qarnissaat pissutigalugu arnat håndboldligami unamminerat unikkallarpoq.