Assammik arsarneq: Kikkut finalessanersut ullumi paasissavaat

Nukappissani SAK Sisimiuneersoq inissisimalluarpoq U-16-it unammersuarneranni arfininngornermi unamminerit sioqqullugit siuartuugallarlutik. Kâgssagssuk Maniitsumeersoq niviarsissani siuartuugallarpoq.

Unamminerni aallarniutaasuni peqataasut tamarmik imminnut unammipput. Unamminerit aallarniutaasut naammassineranni inissilluarnerit marluk aqagu finalemi unammissapput.

SAK siuartuugaluarluni nukappissani unamminerit pikkunartut marluk arfininngornerup ingerlanerani aqqusaartussaavai. Taamaammat suli finale qulakkiinngilaat. Unammisussaavaat GSS pingajuugallartoq aamma Norsaq HC Aasianneersoq tullersortaagallartoq.

Niviarsissat qanoq inissinniunnissaat aamma aatsaat paasinarsissaaq arfininngornermi unamminerit qulingiluat ingerlanneqareerpata. Finale-mut anngussinnaalluartut Kâgssagssuk Maniitsumeersoq siuartuugallartoq aamma NÛK Nuummeersoq tullersortaagallartoq ullumi unammissapput. GSSip Nuummeersup aamma SAKp Sisimiuneersup unamminerat aqagu bronzennanniunnissamut misiliiffiusinnaalluarpoq.

Aajuku tallimanngornermi angusat:
GSS – Nagdlúnguak (nukappissat) 32-15
Kâgssagssuk – Nagdlúnguak (niviarsissat) 26-19
Norsaq HC – GSS (niviarsissat) 16-29
NÛK – SAK (nukappissat) 24-25
Kâgssagssuk – Norsaq (nukappissat) HC 26-26
Kâgssagssuk – Norsaq HC (niviarsissat) 52-9
SAK – Nagdlúnguak (niviarsissat) 18-20
GSS – NÛK (niviarsissat) 14-18
Nagtoralik – Nagdlúnguak (nukappissat) 41-21

Aajuku arfinnngornermi unammisussat:
Nal. 11.00 SAK – GSS (nukappissat)
Nal. 12.10 Kâgssagssuk – NÛK (nukappissat)
Nal. 13.20 Norsaq HC – Nagtoralik (nukappissat)
Nal. 14.30 Nagdlúnguak – Norsaq HC (niviarsissat)
Nal. 15.40 NÛK – Kâgssagssuk (niviarsissat)
Nal. 16.50 GSS – Kâgssagssuk (nukappissat)
Nal. 18.00 GSS – SAK (niviarsissat)
Nal. 19.10 NÛK – Nagdlúnguak (nukappissat)
Nal. 20.20 Norsaq HC – SAK (nukappissat)