Kalaallit angutit assammik arsartartut marlunngornermi Mexicomut ajugaareerlutikAssi: Enok Petersen

Assammik arsarneq: Kalaallit Mexicomut ajugaagamik finalemut anngupput

Assammik arsarnermi nunarsuarmi pissartanngorniunnissamut anngunniunnermi marlunngornermi pisut kalaallit iluaqutissaannut torarput. Cubap naammagittaalliutaa itigartinneqarpoq aammalu unammersuarnerni siullermeerlutik kalaallit ajugaallutik.

VM-mut anngunniunniulluni Mexico Citymi unammisaqattaarnermi unamminerni aallarniutaasuni unamminermi kingullermi kalaallit Mexicomut 32-26-mik ajugaapput.

Taamatut angusaqarnikkut sisamanngorpat finalemut kalaallit anngupput tassanilu ajugaasut kisimik aappaagu VM-rtoqarnissaanut annguffissaanni USA unammissavaat.

Mexicomut marlunngornermi unnukkut unammineq sioqqullugu nalorninartut arlaqarput.

AAMMA ATUARUK Kalaallit Cubalu pissanganaqisumik unammisut: Cuba naammagittaalliuteqarpoq

Ataasinngornermi unnukkut Cubamiut naammagittaalliuteqarpout unamminerup naammassinerani isertitaq kingulleq atortussaatinneqanngimmat. Taakkumi isumaqarput dommeri inaarutaasumik suli sigganngitsoq 28-27-mut isertitsillutik.

Piukkunnaateqarluartoq takutitsilluartoq

Naammagittaalliulli itigartinneqarpoq 27-27-millu unamminerup naammassinera naqissuserneqarluni.

USA Cubamut 32-28-mik ajugaareersoq kalaallit Mexicomut unammineranni piumasaqaat ataasiinnaavoq. Kalaallit pinngitsooratik Mexicomut ajugaasariaqarput finalemut anngunniassagunik.

Tamannalu iluatsippoq muminnermi 16-15-mik siuaqqareerlutik kalaallit 32-26-mik ajugaammata. Piukkunnaateqarluartoq Archibald Lennert isertitsinersaalluni arfineq pingasoriarlutik isertitseriarnermini arfineq pingasoqarpoq, Minik Dahl Høegh arfineq marloraartoq.

Miki A. Heilmann aamma arsarluaqisoq tallimariarluni isertitsivoq.

AAMMA ATUARUK Assammik arsarneq: VM-mut anngunniulluni unamminermi siullermi kalaallit ajorsarput

Finalemi unammineq sisamanngornermi nalunaaqutaq 21.00 pissaaq tassanilu ajugaasut aappaagu Sverigemi Polenimilu VM-rtoqarnissaanut anngutissapput.

Kalaallit finalemi unammisassaminnut USA-mut sapaammi unnukkut unammipput tassanilu USA 36-28-mik ajugaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl