Assammik arsarneq: GSS ajugaaqqippoq

Nunatsinni arnat assammik arsartarneranni GSS Nuummeersut suli kakkannersaapput. NÛK-lli sungiusaasuata pissanngatigaa qaammatit arfinillit qaangiuppata GSS unammillersinnaanerulersimassanerlugu. Kikkut isertitsinersaasut takukkit.
Allattoq Noah Mølgaard
oktobarip 22-at 2012 06:50

Arnat assammik arsarlutik unamminerat Faxe Kondi Cup sapaammi ualikkut naammassivoq. Finalemi GSS Nuummeersut nunaqqatiminnut NÛK-mut 25-15-mik ajugaapput

NÛK-li GM-qarnerani normu 4-nngortoq muminnissaq sioqqullugu akiuulluarpoq muminnermilu 7-9-mik kinguaqqalluni. Assersuisut minnerunngitsumillu aquttuat Nivi Fly GSS-ip isertitseriartarneranik assiilluaqattaarput.

- Unamminissamut Nivi Fly assut piaareersarluarsimagunarpoq, GSS-ip sungiusaasua Johannes Groth muminnermi KNR-TV-mut oqarpoq.

GM-mi peqataasunit pingasuinnaat NÛK-mi peqataaqqipput taamalu iligiit nutartingaatsiarsimallutik. Taamaattoq sungiusarnerup aggustip qeqqani aallartinneraniit imminnut sungiutilertorsimapput taamalu unamminerni aallarniutaasuni GM-mi sølvinnattut SAK Sisimiuneersut 22-19-mik ajugaaffigalugit.

- Sungiusartarnitsinni arnat tunniusimalluarsimapput. Nersualaatariaqarput immikkoortumi ataatsimi GSS qulit ataallugit isertitsitimmatigit. Pissanganarpoq ukiup affaa qaangiuppat GM-qarnissaani sumut killissinnaanissarput, NÛKp sungiusaasua Carsten Olsen oqarpoq.

Mumereernermili NÛK amerlavallaanik kukkusarpoq GSS-illu arsartuisa oqilasuut erngerlutik tamanna kinguneqartittarpaat. GSS finalemi 24-15-mik ajugaavoq.

Bronzennanniunnermi SAK Sisimiuneers0q aamma Nagdlúnguak Ilulissaneersoq naligiinngeqalutik unammipput muminnermi SAK 20-8-mik siuaqqammat unamminerlu naammassimmat 41-18-mik ajugaapput.

Linki ataaniittoq toorlugu isertitsinerpaat allassimaffiat takusinnaavat.

Angusat:
GSS - NÛK 24-15 (9-7) finale
SAK - Nagdlúnguak 41-18 (20-8) bronzennanniunneq
 

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk