Assammik arsarlutik nunanut allanut unammisartut arfininngornermi unamminermi Cubamut ajorsarput
Anngunniuttoqarnerani arsarluarnerpaanut Cubamiunut unamminermi kalaallit arsartartui ilungersorput.
Arsarnerup immikkoortuani siullermi Cuba 18-nik isertitaqarluni siuaqqavoq kalaallit arfineq pingasunik isertitaqartut. Arsarneq naammassimmat Cuba 32-nik isertitaqarluni ajugaavoq kalaallit arsartartui 24-nik isertitaqarlutik ajorsartut.
Nunanut allanut unammisartut sungiusaasuanut ikiorti Johannes Groth tusagassiuutinut nalunaaruteqaruteqarluni ima oqaaseqarpoq:
- Cubamiunut ajugaanissaq ajornakusuussasoq aallaqqaammulli ilisimavarput, tamannalu iluatsissappat arsarnerup aallartinnerani assersuisugut aamma saassussisartugut tamakkiisumik ajunngitsumik arsarnissaat piumasaqaataavoq.
Teknikkikkut kukkunerit ajoraluartumik amerlavallaarput sungiusaasumut ikiorti oqarpoq, erseqqissaatigaalu pissutsit pitsanngortissinnaagunikkit Cubap ajugaaffiginissaannut periarfissaqartoq. Maajip 20-anni Cubami unammiuaarnerup aallartinnginnerani angerlarluta pissutsit tamakkua iluarsiniassavagut, Johannes Groth oqarpoq.
– Takusinnaavarput Cuba saassussigaangat assersuilluartaraluarluta, ullumikkulli assersuinitsigut iluatsitsinnginnersaavugut, Johannes Groth naggasiivoq.
