Assammik arsarluni VM-ertoqarnera KNR TV-kkut aallakaatinneqassaaq

Danskit assammik arsarlutik nunanut allanut unammisartui maanna Sevillamut apuussimalerput, tassanilu allarniutaasumik unamminissaminnik aqagulu unamminissaminnik oqinaarinissaattut isikkoqarpoq. Unammisassaat tassaavoq Qatar. Taamaammat nunanut allanut unammisartut sungiusaasuat Ulrik Wilbek Mikkel Hansen unamminermi tassani sipaarniarlugu aalajangersimavoq.

- Mikkelip unammeqataanissaa pilersaarutiginngilara. Unammisartut tamaasa aallartilluaqqullugit, aammali ilaannik atuivallaaqqunata,  unammersuarnermi matumani tamanik atuisariaqarpunga, Ulrik Wilbek oqarpoq.

Assammilli arsartartut nunarsuarmi pikkorinnersaat unammersuarnermi kingusinnerusukkut unammeqataajumaarpoq. Danmarkip Rusland sapaatiuppat januaarip 13-iani naapittussanngoruniuk pingaarutilimmik unammisussaassaaq. Ataasinngorneq qasuersaarfiussaaq, marlunngorpallu Danmarkip Chile unammissavaa.

Unammisassat tulleraat Island, unamminerlu taanna pingasunngorpat pissaaq, aallarniutaasumillu unammisaqattaarnerit naggaserlugit tallimanngorpat januaarip 18-iani Makedoniamut unammisoqassalluni.

KNR TV-p assammik arsarluni VM-ertoqarneranit aallakaatitassaanut pilersaarutaa:
Arfininngorneq 12. januar 16.00 KNR1 Danmark-Qatar
Sapaat 13. januar 16.00 KNR1 Danmark-Rusland
Marlunngorneq 15. januar 16.00 KNR2 Danmark-Chile
Pingasunngorneq 16. januar 16.00 KNR2 Danmark-Island
Tallimanngorneq 18. januar 16.00 KNR2 Danmark-Makedonia

Danmarkip unammersuarnermi kingusinnerusukkut unamminissai aamma toqqaannartumik aallakaatinneqarumaarput.