Assammik arsarluni Europami pissartanngorniunnerit ullumi aallartissapput

Assammik arsarluni Europami pissartanngorniunnerit ukiormanna Polenimi ingerlanneqartussat ullumi aallartissapput. KNR-illu pisarnini malillugu Danmarkip unammineri KNR2-kkut toqqaannartumik aallakaatissavai.
Assi © : EHF EURO 2016
Allattoq Karsten Sommer
januaarip 15-at 2016 06:20
Nutserisoq Simon Uldum -

Danmarkip semifinalimut anngunnissaa Danmarkip nunanut allanut unammisartuisa sungiusaasuata islandimiup Gudmundur Gudmundssonip anguniagaraa.

Gruppimi aallarniutaasumi Danmarkip illoqarfimmi Gdanskimi Rusland, Montenegro aamma Ungarn unammissavai.

Danmarkip unammisassaa siulleq tassaavoq Rusland, unamminerlu taanna arfininngorpat nal. 16.00 KNR2-kkut aallakaatinneqassaaq.

Gruppimi tassani pitsaanerit pingasut kingorna gruppi C-mi pitsaanerit pingasut unammissavaat. Gruppi C-miittut tassaapput Spania, Sverige, Tyskland aamma Slovenia.

Unamminerillu soqutiginarnersarigunagaat tassaavoq ullumi unamminerit siullersarisaat. Island Norgelu unammissapput, unamminerlu taanna nunatsinni nalunaaqutaq malillugu 14.15 aallartissaaq TV-Sportikkullu aallakaatinneqassalluni.