Assammik arsarluni Brasiliami pissartanngorniunnermi bronzinnannertik nivissat nukappissallu qiimmassaatigissaqaat
Assammik arsarluni Brasiliami pisartanngorniunnermiit naggataaruteqassaagut.
Inuusuttuaqqat U18-imik taaneqartartut Amerika tamakkerlugu pissartanngorniunnermi ullumi marlunnik bronzinnapput.
Nivissat nunatsinneersut Uruguayimut unammimmata tamanna pissanganartumik ingerlarpaluppoq. Unammineq naammassimmat nivissat nunatsinneersut 26-25-imik ajugaapput.
Nukappissat Mexicomut unamminerat nivissat unamminerattulli pissanganartiginngilaq, taamaattorli nukappissat nunatsinneersut 28-19-imik ajugaapput.
Holdlederi Kiistat Isaksen ualimut pissarsiaraarput, oqaluttuarporlu bronzinnassinnaagamik soorunami nuannaaqalutillu tulluusimaaqalutik. U18-mi ukiut marluk matuma siorna siullerpaamik ilaagamik taamanikkut nr. 7-inngorsimapput, maannalu 3-ngoramik pitsanngoriaat annertummat taanna nuannaarutissarujussuuvoq unnerpaa.
-Nivissat maanna taama angusaqarnertik qiimmassaatigisorujussuussavaat, piumassuseqarnerannullu annertusaataassasoq ilimanaqaaq, Kiista Isaksen oqarpoq.
Unammiat inuusuttuarannguupput, bronzinnannerallu siunissami qanoq sunniuteqassanersoq apeqqutigigatsigu oqarpoq nr. 3-tut inissinnertik iluaqutigissaqigaat.