Assakaasulinnik sisorarluni GM unnugu aallartissaaq
Sisoraatinik oqilaniuttartut peqatigiiffiat KS-69 Maniitsumeersoq pisortatigoortuunngitsumik assakaasulinnik sisoraatinik oqilaniunnermi GM-imik aaqqissuisuussaaq.
![](/sites/default/files/styles/image_934x467/public/article_images/rulleski_630.jpg?itok=nTapHYRS)
Allattoq Noah Mølgaard
Sisoraatinik oqilaniuttartut 25-it niaqorornaveeqquserlutillu assakaasulinnik sisoraasissapput GM unnugu Maniitsumi aallartippat. Siullertut unammissutigineqassaaq marlukkaarluni naatsumut unammineq.
Ukiup aappassaa assakaasulinnik sisoraaserluni GM ingerlanneqassaaq tamatigullu KS-69 aaqqissuisuusarpoq. Ukiormanna peqataasussat Ilulissaniit, Aasianniit, Sisimiuniit, Maniitsumiit Nuummiillu aggersuupput.
- Peqataasussat ilaat aatsaat unnugu tikittussaapput. Taamaammat unamminissat tulleriiaarnerat allanngortiallassimavarput unnugu marlukkaarluni naatsumut unammisoqartussanngorlugu taava aqagu angutit 15 kilometerimut arnallu 10 kilometerimut unammissapput, KS-69-imiit John Olsen KNR-imut taama ilisimatitsivoq.