Assagiarsunniarnissamut akuersissutinik tunisisoqanngilaq
Siumut siulittaasuata, Aleqa Hammondip apeqqutaanut Aalisarnermut Naalakkersuisup, Ane Hansenip akissutaata tamanna ersersippaa.
Aleqa Hammondip tupigusuutigaa sooq avataani aalisartut assagiarsunnik pisassinneqarsimannginnersut, peqatigitillugulu apeqqutigalugu pisassiinnginnerup kinguneranik aalisartut ikiorsiissutinik tunineqassanersut.
Akissummi erserpoq ikiorsiissutinik tunisinissaq pilersaarutaanngitsoq. Assagiarsunniarnermi aalisaatit atortullu allat pisiarineqarneranni aalisartut tamanna namminneerlutik akisussaaffigigaat, tassalu tamanna Naalakkersuisut taarsiinissaannut pisussaaffiliinngitsoq, Naalakkersuisunit oqaatigineqarpoq.
Atortunut aningaasartuuteqarneq aalisartut namminneerlutik akisussaaffigigaat, taakkulu aalisakkanik allanik pinialersinnaanermut piareersimanissartik akisussaaffigigaat, Ane Hansenip akissutaani ilaatigut tamanna erserpoq.
- Aalisartut namminneerlutik aningaasartuutigisimasaat taarsiiffigissallutigit Naalakkersuisut tungaanniit pissutissaqanngilagut pilersaaruteqaratalu, Ane Hansen akivoq.
