Assagiarsunniarnerup unitsikkallarneqarnera kukkunerusoq nalunaarutigineqarpoq

Aqutsiveqarfimmi Nuuk-Paamiuni assagiarsunniarnerup unitsikkallarneqarnera, Aalisarnermut naalakkersuisoqarfiup tallimanngormat apriilip ulluisa tallimaanni nalunaarutigaa. Naalakkersuisulli taama nalunaaruteqarnertik kukkunerusoq maanna nalunaarutigaat.

Aalisarnermut naalakkersuisoqarfiup tamanna pillugu maanna erseqqissaatigalugu ilisimatitsissutigaa aqutsiveqarfik Nuuk-Paamiuni assagiarsunniarneq unitsikkallarneqanngitsoq.

Aqutsiveqarfik Nuuk-Paamiuni assagiarsunniarnerup unitsikkallarneqarneranut nalunaarut, Kalaallit Nunaanni Aalisartut Piniartullu Kattuffiata, KNAPK-p, isornartorsiorarluarpaa:

- KNAPK-p naammagigunnaavippaa naalakkersuisoqatigiit ilaasortarpassuatsinnut pissusilersortualernerat. Aalisartut taakkulu kattuffiat KNAPK qulaatiinnarlugu maanna matusineqalerpoq. Tamanna akuerisinnaanngilluinnarparput, KNAPK, Naalakkersuisut tallimanngormat nalunaarutaannut taama qisuariaateqarpoq.

Naalakkersuisulli kukkusimanertik maanna tassa nalunaarutigaat:

- Kukkunerput ajuusaarutigaarput, tusagassiutinullu nalunaarummut tunngasumit akornusersuisimasinnaanerput, Aalisarnermut naalakkersuisoqarfik ualeq manna taama nalunaaruteqarpoq.

Aqutsiveqarfik Nuuk-Paamiuni assagiarsunnik 1200 tonsinik ukioq mannamut pisassiisoqarpoq. Assagiarsuit pisassiissutigineqartut 47 procentii marsip ulluisa 31-anni pisarineqarsimasut, Kalaallit Nunaanni Aalisarsinnaanermut Akuersissutinik Nakkutilliiisoqarfiup, KANUAANA-p, ilisimatitsissutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat