Assagiarsunniarnerup unitsikkallarneqarnera kukkunerusoq nalunaarutigineqarpoq

Aalisarnermut naalakkersuisoqarfiup tamanna pillugu maanna erseqqissaatigalugu ilisimatitsissutigaa aqutsiveqarfik Nuuk-Paamiuni assagiarsunniarneq unitsikkallarneqanngitsoq.

Aqutsiveqarfik Nuuk-Paamiuni assagiarsunniarnerup unitsikkallarneqarneranut nalunaarut, Kalaallit Nunaanni Aalisartut Piniartullu Kattuffiata, KNAPK-p, isornartorsiorarluarpaa:

- KNAPK-p naammagigunnaavippaa naalakkersuisoqatigiit ilaasortarpassuatsinnut pissusilersortualernerat. Aalisartut taakkulu kattuffiat KNAPK qulaatiinnarlugu maanna matusineqalerpoq. Tamanna akuerisinnaanngilluinnarparput, KNAPK, Naalakkersuisut tallimanngormat nalunaarutaannut taama qisuariaateqarpoq.

Naalakkersuisulli kukkusimanertik maanna tassa nalunaarutigaat:

- Kukkunerput ajuusaarutigaarput, tusagassiutinullu nalunaarummut tunngasumit akornusersuisimasinnaanerput, Aalisarnermut naalakkersuisoqarfik ualeq manna taama nalunaaruteqarpoq.

Aqutsiveqarfik Nuuk-Paamiuni assagiarsunnik 1200 tonsinik ukioq mannamut pisassiisoqarpoq. Assagiarsuit pisassiissutigineqartut 47 procentii marsip ulluisa 31-anni pisarineqarsimasut, Kalaallit Nunaanni Aalisarsinnaanermut Akuersissutinik Nakkutilliiisoqarfiup, KANUAANA-p, ilisimatitsissutigaa.