Assagiarsunniaqqusiunnaarneq tupaallaatiginngilaa

Assagiarsuit qaleruaasa qituliulernerat tunngavigalugu, kitaani tamarmi aasaanerani assagiarsunniaqqusiunnaarlutik naalakkersuisut aalajangiusseqqammerpput. Paamiuni borgmesterip Lars Sørensenip tamanna tupaallaatiginngilaa.

Assagiarsuttanut Tunitsivik Paamiuniippoq. Ippassarlu taama aalajangertoqarnera pillugu Tunitsiviup pisortaa Arvid Buhrkarl ippassaq radio aviisimi tupaallaatiginneqaluni oqaaseqarpoq.

Paamiuni borgmesteri Lars Sørensen oqarpoq, assagiarsuit aasaanerani piniagaajunnaarallarnissaannik aalajangertoqartoq illuatungeriit upernaaq Aalisarnermik Piniarnermillu pisortaqarfik peqatigalugu ataatsimeereernerisa kingorna.

- Aalisartut namminneerlutik kissaatigaat qaammatini marlunni aasaanerani unititsigallartoqarnissaa, taamaaliornermikkut pisassiissutissat ukiup naajartornerani pisassanut ilanngunneqaannarniassammata, Lars Sørensen oqarpoq.

Taassuma aamma suliffissaaruttoqariataarnissaa ernummatiginngilaa.

- Illoqarfitsinni suliffissaaleqineq 1,5 procentiinnaavoq, allanik suliffinnik aamma periarfissaqarpoq, Lars Sørensen oqarpoq.