Asimut eqqaannakkat salinneqartussat assileqquaat
Sumiiffinni amerlaqisuni eqqagassarsuarnik ulikkaarpoq pinngortitami kusanaallisaataaqisumik.
Taamaattumik kommunimi innuttaasut pinngortitamiinnerminni sumut tamaanga eqqakkanik naammattuuigunik assiliisaqqullugit kajumissaarneqarput.
Assilineqartut kuunni eqaloqarfinni tupersimasarfinnilu eqqakkat nalunaarsorneqarnerannut atorneqassapput, taamaattumillu assilisat sumi assilineqarsimanersut eqqoqqissaartumik nalunaarsornissaat pingaaruteqarluni, Sisimiuni aviiseeqqami Sivdlermi kommuni allappoq.
Kommunip ilaatigut assit e-mailikkut nassiunneqartut imaluunniit Teknikkimut Avatangiisinullu Immikkoortortaqmut tunniunneqartut tunngavigalugit sumiiffinni taakkunani saliinissaq sulissutigissavaa.
Aammattaaq Qeqqata Kommuniata kikkunnut tamanut kajumissaarutigaa - soorunalimi - inuit asimiissimagaangamik eqqagassaatitik angerlamut utilerunik nassartaqqullugit, taamaalilluni nuna eqqiluitsuutinneqassammat kinguaassatsinnullu nuannaarutaalluni.
