Asimi internettimut attaveqarsinnaalerneq

Takorloorsinnaaviuk sermersuup qeqqaniillutit, imaluunniit kangerluit iluini internetimut attaveqanngitsuni internetersinnaalernissat? Tamatuma piviusunngornissaa qanilliallappoq.

Qaammataasatigut attaveqaqatigiinnermut ingerlatseqatigiiffik OneWeb aqqutigalugu Tele Greenland internettimut attaveqaammik sukkasuumik tunisisinnanngornissani anguniarlugu ingerlatseqatigiiffimmut oqaloqatiginnileruttorpoq.

AAMMA ATUARUK Tele Greenlandip Tunumi internetsip sukkatsinnissaa neriorsuutigigaa

Ingerlatseqatigiiffik OneWeb nunarsuup avataarsuani qaammataasanik 254-inik attaveqaateqarpoq. Taakkununngalu attaviniffissat parabolit Nuummi illoqarfiup ungasinngisaani ikkussuunneqaqqammerput, taakkua atorlugit qaammataasat iluaqutigalugit interneti sumiluunniit atorneqarsinnaasoq sukkanerusorlu pilersinniarneqarput.

Taamaalilluni nunarsuup avannaatungaani sumiikkaluaraanniluunniit sukkasuumik internetertoqarsinnaalissasoq OneWebimiit oqaatigaat.

Nunatsinni attaveqaatinut tuniniaasut oqaloqatigineqaleruttorput, attaveqaatilli atuutilernissaanut isumaqatigiissuteqaratik OneWebimiit aamma oqaatigaat.

TelePost isumaqatiginninnialeruttorpoq

Tele Greenlandi aqqutigalugu innuttaasunut interneti sukkasooq sumiluunniillu atorsinnaasoq novembarimi periarfissaalernissaa anguniagaasoq, OneWebimi tuniniaanermut attaveqaqatigiinnermullu pisortap, Tabitha Aldrich-Smith oqaatigaa.

- Nunami attaveqaatinik tuniniaasut suleqatigineratigut kalaallinut neqeroorutaalissaaq. OneWeb toqqaannartumik pisiffiginngikkaluarlugu, attaveqaatinik nunassinni tuniniaasunut pisiniassaasi, taakkulu sukkanerujussuarmik Kalaallit Nunaat tamakkerlugu attaveqaateqalernissamik neqeroorsinnaalissapput.

OneWeb qaammataasatigut internetimut attaveqaatissaat pillugit oqaloqatigineqartoq TelePostimiit KNR-imut oqaatigaat. 

Taannalu atorlugu attaveqaateqalissappat pisisiartunut akimik naleqquttumik isumaqatigiissuteqartoqartariaqarpoq:

- Qaammataasiaq atorlugu internettimut attaveqaateqalissagutta, pitsaanerulernissaannaa kissaatiginngilarput, pisisartutsinnullu akikinnerunissaa kissaatigaarput. Ullumikkut internettitsinniit attaveqaat sukkanerusoq attaveqaatigilissagutsigut pisisartutsinnut akeq naleqquttuussaaq, Tele postimi Wholesalemi pisortaq, Flemming Drechsel KNR-iut oqarpoq.

Nunarsuaq tamakkerlugu OneWebimiit qaammataasatigut interneteqalersinnaanissaq 2022-mi pilersaarutaavoq.