Asimi ikuallanneq nammineerluni qamissaaq

Ullumi ulloqeqqalersoq Uummannami politiit nalunaarfigineqarput, Naajaattaani Torsukattammiittumi nunavimmi annertujaamik ikuallattoqartoq.

Ikuallanneq qanoq ililluni aallartissimanersoq, Uummannami politiit oqaatigisinnaanngikkallarpaat. Taamaattumik ikuallattup angallattunit qanilliniarneqarnissaa politiinit mianersoqqussutigineqarpoq.

- Ikuallanneq inunnik, uumasunik allanilluunniit nalilinnik eqquisussaanngitsutut qatserisartunit nalilerneqarpoq, taamaammallu qatseriartortoqarani, taama oqarpoq Qaasuitsup Kommuniata qatserisartuini upalungaarsimanermut pisortaq Johan Høeg Hansen.

- Pinngortitami ikuallannerit naammattuugassaasarput, taakkuli inunnik, najugaqarfinnik, timmiaqarfinnik nunailluunniit eqqissisimatitanik aarlerinartorsiortitsinngikkaangata qatserinissaq pineq ajorpoq.

Ikuallannerup nammineerluni qaminnissaa qatserisartut naatsorsuutigaat, qanorlu pinera malinnaaffigeqqissaarniarlugu.

Qatserisartuni upalungaarsimanermut pisortap inuit ikuallattup eqqaaniittut eqqaaniissamaartulluunniit qinnuigai, ikuallattup pujuata najuussorsinnaanera mianersuutigeqqullugu.