Asiip qilalugartassiineq akerlilerpaa
Qilalukkat pisassiissutit amerliniarneqarnissaannik naalakkersuisut aalajangernerat pinngortitamut avatangiisinullu naalakkersuisup Asii Chemnitz Narup-ip akerlerigaa, AG-mi ullumi saqqummersumi allaaserineqarpoq.
- Finn Karlsenip Atassummeersup Pinngortitaleriffiup mianersoqqussutaa tusaanngitsuusaarpaa piniartullu kissaataat malillugu Asii Chemnitz Narup, ilaatigut taama AG-mi issuarneqarpoq.
Asii Chemnitz Narup-ip ernummatigaa, qilalukkat piniarneqarpallaarnerat nungusaataanngisumik piniarnermut sunniuteqarnissaa.
Taanna isumaqarpoq, pinngortitamik illersuinissamik inatsimmik inatsisartut 2003-mi akuersissutigisaannik qilalukkanik qernertanik pisasseeqqinneq sanioqqutitsinerusoq.
- Inatsimmi tassani allassimavoq uumasoqatigiit nungusaataanngitsumik piniarneqarnissaat tunngavigalugu illersuisoqassasoq mianersornissamik tunngavigisaq malillugu, AG-mi taama allassimasoqarpoq.
Mianersoqqusinerlu ima paasisassatut erseqqissaatigineqarluni; ”Pisuussutit nungusaataanngitsumik piniarneqarnerat qularutigineqassappat, tamanna pinngortitamut iluaqutissanngortinneqassaaq”.
Nangillugulu erseqqissaatigineqarpoq inatsimmi aamma allassimasoqartoq imaattumik, issuaaneq aallartippoq, ”uumasunit pisuussutit illersorneqassapput amerlisarneqassallutillu, qanga kulturi tunngavigalugu, nungusaataanngitsumik piniarnermi piujuaannartitsinissamut naleqqutissappat”. Issuaaneq naavoq.
