Asiip Naalakkersuisut pakatsissutigigai
Mittarfissat qanoq takissuseqassanersut Naalakkersuisoqatigiinni isumaqatigiinngissutigineqarpoq.
Nuummili mittarfik takinerusoq atorfissaqartinneqartoq, taannalu 2200 meteriusut takissuseqassasoq, Asii Chemnitz Narupip aalajangiusimavaa.
- Eqqaasitsissutigerusuppara, Nuup illoqarfia inuttusiartormat, alliartormat. Taamaammat inuit amerlanerusut Nuummut sukkasuumik ingerlasinnaanissartik Nuummiillu aallaqqissinnaanissartik aamma pisariaqartippaat, Asii Chemnitz Narup KNR-imut oqarpoq.
AAMMA ATUARUK GE: Neriorsuutisi attanniarsigit
Nuup 2200 meterisut takissusilik atorfissaqartikkaa
Angallannermi periarfissat nunatta illoqarfiisa pingaarnersaannut tulluarsarneqartariaqartut Asii Chemnitz Narup isumaqarpoq.
- Mittarfik 2200 meterisut isorartutigisariaqarpoq. Taanna piumasaqaataasariaqarpoq, avaqqunneqarsinnaanngilaq, Asii Chemnitz Narup oqarpoq.
Kalaallit Airportsip Nuummi Ilulissanilu mittarfinnik sanaartornissamut suliariumannittussarsiuussineq, maajip ulluisa 20-anni pisussaagaluartoq, kinguartippaa.
Tamanna, ingerlatseqatigiiffik naapertorlugu, mittarfiit takissusissaannut ersernerluttoqarnera pissuteqarpoq.
AAMMA ATUARUK Per Aarsleff A/S suliariumannittussarsiuussinermit tunuartoq
Aningaasaleerusuttunik qimarratsitsisinnaasoq
Taamaattoqarnera aningaasaliisartunik Nuummi aningaasaliinissamut soqutiginnittunik qimarratsitsisinnaasoq Asii Chemnitz Narup Sermitsiaq.AG-mut oqarpoq.
Nuummilu mittarfik 2200 meterinit naannersumik sanaartornissamik aalajangiisoqassappat, tamanna ineriartornermik unitsitsissasoq borgmesterip aarleqqutigaa.
- Ineriartornissaagaluaq nunatsinni tamarmi unittuuilluni unittuussasoq aarleqqutigilluinnaqqissaarpara. Imaluunniit ilaannakortumik aaqqiissuteqartoqassasoq, taakkulu akisoorujussuullutillu ukiut amerlasoorsuunngitsut qaangiuppata, nutaamik nalilersorlugillu talleqqittariaqassasut. Kisianni tassa ineriartornermik unitsitsinissaq, taanna aarlerinarnerpaajuvoq, Asii Chemnitz Narup oqarpoq.
AAMMA ATUARUK Hurtigruten Nunatsinni aningaasaleerusussinnaasoq
Partii Naleraq mittarfiit takissusissaannut periarfissat allat misissorneqarnissaannik kissaateqarluni siusinnerusukkut nalunaarutigaa. Ilaatigullu taamaattoqarmat sanaartornissamut suliariumannittussarsiuussinissaq kinguartinneqarpoq.
Misissuisoqaqqinnissamilli kissaateqarneq Asii Chemnitz Narupip eqqarsarnartoqartippaa.
- Nunatsinni ukiorpaalunni malinnaasimasut eqqaamaqqissaarpaat, 1990-kkut qiteqqunneranniilli misissuinerit arlariit naammassineqartarnikuusut. Taamaammat ukiut 20-nngortorsioreerlugillu aammaarluni misissueqqittoqassappat eqqarsarnartoqartorujussuuvoq, Kommuneqarfik Sermersuup borgmesteria Asii Chemnitz Narup oqarpoq.
