Asiip borgmestereqatini isornartorsiorpai

- Oqaloqatigiinnermik ataqatigiinnermillu uanga paasinnittaatsinnit allaanerusumik borgmestereqatikka pingasuusut paasinnittartut ajuusaarutigisannik paasivara. Ataatsimoorluni oqaloqatigiinneq pinnagu Kommuneqarfik Sermersooq avaqqullugu, immikkut peqatigiinnissartik qinersimavaat, borgmesteri allappoq.

Taanna isumaqarpoq, Siumup borgmesteriutitaasa ataastimoorutigisaat tassaasoq, kommunini allani aningaasakilliortoqaraangat Nunatsinni illoqarfiit pingaarnersaata pilliuteqartarnissaa.

- Kommunini pingasuusuni assigiimmik partiimik tunuliaqutaqarfiulluni isumaqatigiissutigissallugu ajornanngeqaaq, ataatsimut kisilluni allamik parteeqartumut sanilliullugu, Asii Chemnitz Narup nassuiaavoq.

Taassuma ilanngullugu erseqqissarpaa, Kommuneqarfik Sermersuup Kalaallit Nunaanni ajornartorsiutinut aaqqiinissamut soorunami kivitseqataasusaanera, aamma naapertuilluartumik oqimaaqatigiissumik aaqqiisoqartarnissaanut suleqataasussaasoq.

- Taamaaliornissamili tunngaviit ersarissut aallaavigineqartariaqarput, tassa kommunit aamma Namminersorlutik Oqartussat akornanni aningaasatigut agguataarinermi suut tamaasa qulaajaavigalugit pisariaqarmat, Asii Chemnitz Narup allappoq.

Taassuma ilanngullugu isornartorsiorpaa, maannakkut aqqiinerup kinguneranik innuttaasut aningaasatigut ilungersornerpaat kommunini allani innuttaasunut pigissaarnerpaanut akiliisarmata.

- Illoqarfiit pingaarnersaat Nuuk Kommuneqarfik Sermersuumi kisimi illoqarfiunngimmat eqqaasitsissutigissavara, aammali illoqarfiit Paamiut, Tunumilu najugaqarfiit tamarmik aamma ilaammata, borgmesteri nassuiaavoq.