Asiip assigiinngisitsisoqarnera kamaatigaa

Nuummi innuttaasut namminersorlutik oqartussat ilinniartunut ineqarfiini inissamik pissarsisinnaanngillat, Nuummilu Piareersarfiup inissaatai killeqartupilussuit utaqqisunullu allattorsimaffiit takisuupilussuit naammagiinnartariaqartarpaat.

Namminersorlutik Oqartussanit erseqqissaatigineqarpoq nalunaarut naapertorlugu sinerissamit ilinniariartut salliutittussaallugit.

Kommuneqarfik Sermersuumi borgmesterip, Asii Chemnitz Narupip, tamanna naammaginngilluinnarpaa. 

- Akuerineqarsinnaanngilluinnarpoq. Pisortat qanoq ilinerani innuttaasunik immikkoortitsisisinnaatitaagamik? Pisortani sullissinermi naligiimmik sullissinissatsinnut perorsagaavugut, kikkullu tamarmik assigiimmik pisussaallutigit. Taamaammat akuerineqarsinnaanngilluinnarpoq, borgmesteri oqarpoq.

Namminersorlutik oqartussat Nuummi sanaartoqqullugit kaammattorpai, maannalu inissisimaneq pitsaasuunngitsoq aamma nassuerutigalugu.

- Ilumoorlunga oqassaguma, kommunitsinni neqeroorutigisavut killeqartupilussuupput. Qinigaaffimmi aggersumi inissiarpassuarnik sanaartorniarluta nalunaarutiginikuuarput, inissaaleqinerlu annertuupilussuaq aaqqiiviginiarlugu taamaaliorniarpugut. Aammami Nuummi sanaartortoqartariaqarpoq, maani pisariaqartitsineq annertummat, borgmesteri oqarpoq.