Asii Narup: Pisuutitsiniarnerit tunngavissaqanngillat
-Qinikkat tamatta aqutsisoqatigiinnut imissutigaarput aningaasaqarneq sukannerluinnaqqissaartoq aqqutissiuutissagaat. Siunissaq qaninnerusoq ungasinnerusorlu eqqarsaatigalugit aningaasartuutikillisaanissaq kiisalu peqqissaarluinnartumik sukannersumik aningaasanik aqutsinissamut pilersaarut suliarineqassasoq kissaatigaarput, isumaqatigiippugullu pilersaarut tamakkiisoq aasaanerani sulinngiffeqannginnitsinni saqqummiunneqassasoq, Asii Chemnitz Narup taama oqarpoq.
Allagaatinik takunnissinnaatitaanermik Radioaviisimit qinnuteqaratta paasissutissat tigusavut naapertorlugit Kommuneqarfik Sermersuumi aningaasatigut aqutsineq Naalakkersuisoqarfiup qularnartutut nalilersimavaa maleruagassanillu atuuttunik paasinnissimanersoq apeqquserlugu.
AAMMA ATUARUK: Kommuneqarfik Sermersooq sukannersumik nakkutigineqalersoq
Aningaasartuutit amerlisimasut, soorlu isumaginninnerup iluani innarluutilinnut, meeqqanut inuusuttuaqqanullu kiffartuussinermut kiisalu suliffissaaleqisut amerliartornerannut aningaasartuutit amerlisimasut borgmesteri oqarpoq.
Kommunalbestyrelsemi illuatungiliuttut aamma isornartorsiuisimapput, pisunilli malinnaatinneqartuarsimasut borgmesterip erseqqissaatigaa. Aningaasat tigoriaannaat 2012-ip naanerani 180 million koruunioriarlutik siorna ukiup naanerani 23 million koruuninut apparsimanerat pillugu borgmesteri ima nassuiaavoq:
-Ikinngutinnersumik nunaqqatitsinnut eqqaasitsissutigerusuppara aningaasat minnerunngitsumik sanaartornermut atorneqarsimammata, assersuutigalugu Nuummi Atuarfik Hans Lynge pilersaarutigineqartumit akisunerusimammat aningaasaleeqqissimagatta. Nuummi marlunnik meeqqerivilioqqinnikuuvugut. Taamaattumik aningaasat tammartinneqarsimasutut isikkoqartinniarneqarneri tunngavissaqanngilaq. Aningaasat pisariaqartinneqartunut atorneqarput.
