Asii: Ilisimatusarfiliortoqassappat nunatsinni sorlaqassaaq

- Nunatsinnut attuumassutilimmik peqqissutsimut ilisimatusarfiliortoqassappat nunatsinni sorlaqartariaqarpoq.

Nunatsinni peqqinnissaq pillugu Ålborgimi ilisimatusarfiliortoqalerneranut atatillugu taama oqarpoq Peqqissutsimut naalakkersuisoq Asii Chemnitz Narup.

- Isumaqarpunga imatut nipeqartariaqanngitsoq Peqqissutsimut ilisimatusarnerup tungaatigut soorlusooq aatsaat susoqalersoq, Asii Chemnitz Narup oqarpoq.

Taanna erseqqissaavoq nunatsinni pingaartikkitsik peqqissutsimut ilisimatusarnerup tungaatigut ingerlatat ataqatigiissumik ingerlanneqarnissaat, taamatuttaaq nunatsinni sorlaqarnissaat.

- Uagut maani suleqatigeriikkagut pitsaasumik suleqatigaagut, naliligiittutut inissisimavugut aammalu kissaatigut pisariaqartitattalu suunerinik taakkua naalaarluartarmatigut, oqarpoq.

Aperaarput nunatsinni pioreersut taakkunannga qallerniarneqarnersut.

- Ukiup uuma aallartinnerani allakkatigut ilisimatippakka ilisimatusarfiliorniarnermut apeqqut nunatsinniit assut isummerfigiuminaaqisoq, tassami sumi tamaani centeriliortoqartarpoq uagut isummerfigisinnaanngisatsinnik, Asii Chemnitz Narup oqarpoq.

Taanna aamma oqarpoq annerusumik tamanna pillugu isumasiorneqaratillu suleqataatinneqarsimanatik.

- Nunatta atia atorlugu ilisimatusarfiliorput, tamatuma kingunerisaanik taava inuit tassunga ilisimatusarfimmut naatsorsuuteqartorujussuanngussapput, oqarpoq.

Nangilluni erseqqissaavoq, ukiorpassuanngortuni nunatsinni ilisimatusarnermik ingerlatsisoqareersoq, allamillu ilisimatusarfiliortoqassappat maani nunami aamma angerlarsimaffeqarlunilu sorlaqartariaqartoq.

Aperaarput soormi aningaasaleeqataaffigisimaneraat.

- Tassunga centerimuunngitsoq kisianni soorunami ilisimatusarfimmik ingerlataqartut allatuulli aningaasanik qinnuteqaateqarsinnaapput. Ukiumut 300.000-t tungaanut finanslov-itsinni immikkoortitsisarpugut peqqissutsikkut ilisimatusarniartunut, Asii Chemnitz Narup oqarpoq.

Taanna aamma erseqqissaavoq Ålborgimi ilisimatusarfiliornialersaartut

ilisimatitsinerinnarmik paasissutissiisimasut.