Asii: Ikaarsaariarnermi ataatsimiititaliat suliassaat imaannaanngitsuupput

Kangia/Kitaani kommunimut ikaarsaariarnermi ataatsimiititaliap siulittaasua, Asii Chemnitz Narup oqarpoq, qaammatini arfineq marlunni piareersarnissaq imaannaanngitsuussasoq: - Uagut ikaarsaariarnermi ataatsimiititaliami suliassavut ersarissorujussuarmik nalunaarsorneqarsimasutut uanga isumaqarfigivakka, inatsisartut kommuneni aaqqissuusseqqinneq pillugu inatsisiliaanni. Taamaattorli aamma oqaatigisariaqarpoq piffissakittuararsuulluta sulivugut, suliassat annertuut ukiup naanissaata tungaanut piareertussaassavagut. Massakkut kommunalbestyrelseusut aamma suliassaat imaanaanngitsuuvoq kommunet ukiorpassuarni pioreersut suliassaqarfiisa matunissaannik suliaqarlutik ingerlammata. Taakkua uagullu ikaarsaariarnermi ataatsimiititalianiittugut, uangalu siulittaasutut maannakkut borgmesteriusut qanimut suleqatigissavakka suliat ataqatigiissaarluarnissaat qulakkeerniarlugu, Asii Chemnitz Narup oqarpoq.