Asii: Doris kukkuvutit
Kommuneqarfik Sermersuumi sulisut 2200-sut nunaqavissut sulisorineqartut amerlanerupput.
- Imaaliallaannaq akisinnaanngilara, kisianni uuttuutissatut piukkunnartutut oqaatigisinnaavara, siorna atorfinittut 27-t pisatai assartorneri, qallunaat nunaanninngaanniit Kommuneqarfitsinnut akilernikuuagut, Kommuneqarfik Sermersuumi Borgmesteri Asii Chemnitz Narup oqarpoq.
Taakkunaniilli nunatsinneersut aamma ilaapput.
-Tallimat kalaaliupput qallunaat nunaanninngaanniit ilinniareersimallutik angerlartut, Asii Chemnitz Narup taama oqarpoq.
Aamma atuaruk Suliffeqarfissuit Doris tunngavissaqannginnerarpaat
Allallu assigalugit aatsaat pissarsisinnaavitsinnatik nunanit allanit tikisitsisariaqartarput, sulisorineqalertarnerallu tunngavissaqarpoq.
- Suliassat immikkuullarissunik piginnaaneqarluni ilinniagaqqortuunik ilinniarluarsimasunik naammassineqarsinnaasut ujartoraangatsigit taava nunatta avataaninngaanniit pissarsiortariaqartarpugut. Aamma meeqqat atuarfiannut ilinniartitsisussanik ujartuigaangatta aamma ilaatigut nunatta avataaniit tikisitsisariaqartarpugut, soorunami meeqqat atuarfiini ilinniartitsisutut naammassisimasut ujartortariaqartaratsigit, Asii Chemnitz Narup oqarpoq.
Kommuneqarfik Sermersuumi Borgmesterip ilanngullugu oqaatigaa nunaqavissut ilinniarluarsimasut sulisorilerumallugit iliuuseqartarlutik.
Aamma atuaruk Doris Jakobsenip brugsenimut uparuaanera annertuumik akerlilerneqarpoq
- Ilisimatusarfimmi ilinniartut pileritsatsikkusuttarpagut naammassereerunik kommuneqarfitsinni sulilerumaarnissaannut. Taamaattumik ilinniartuunnerisa nalaanni, immikkut ittumik ilinniartunut neqeroortarpugut atorfinnik. Taakkuali pitsaasorujussuarnik misilittagaqarfigivagut, Kommuneqarfik Sermersuumi Borgmesteri Asii Chemnitz Narup taama oqarpoq.