Asii Chemnitz Narupip tunuarnera inuiaqatigiinni annaasaqarnerusoq

Ukiorpassuarni politikeriusimasoq, Asii Chemnitz Narup (IA) Inatsisartunit tunuartoq ippassaq nalunaarutigineqarpoq.

Tamannalu malugineqarsinnaassaaq. Inuit Ataqatigiinni siulittaasup tullia, Aqqaluaq B. Egede taama isumaqarpoq.

- Asiip immikkuullarequtigivaa siunertani anguniakkani sapanginnagu anguniavittaramiuk ilungersuullugu. Taavalu aamma ataatsimiinnerni paasissutissani atuagassani pitsaasumik suliaralugit, piareersarluarsimallugit sassartarnera, sulianillu ingerlasarnera assorujussuaq inuiaqatigiinnut pissarsissutaasimavoq.

- Taamaammat taanna Asiip pisinnaasamigut killeqalernini patsisigalugu tunuarnera inuiaqatigiinnut annaasarujussuartut taasariaqarpoq, taanna oqarpoq.

Asii Chemnitz Kommuneqarfik Sermersuumi ukiut qulit ingerlanerani borgmesteriullunilu Inatsisartuni arlaleriarluni ilaasortaasimavoq.

2021-mi qinersinerup kingorna aningaasaqarnermut nunamullu imminermut naalakkersuisunngorpoq, taassumali Kommuneqarfik Sermersuumi borgmesteriuneranik piffissamik Nakkutilliisut isornartorsiuinerata kingorna ukioq taanna novembarimi tunuarluni.

Arnat pisinnaatitaaffii

Aqqaluaq B. Egedep oqarnera naapertorlugu Asii Chemnitz Narupip sivisuumik politikkikkut suliaqarnera arnanut allanut kalaallit inuiaqatigiivini sunniuteqaqataarusuttunut sunniuteqartorujussuusimavoq:

- Aamma isumaqarpunga immikkut taalaartariaqarlugu partiitta naalakkersuinikkut sulinerani arnat pisinnaatitaaffiinut aamma arnat sunniuteqaqataanissaanut annertusaanermi Asii suliaqarnikuummat.

- Aamma peqataaginnarnani siuttuusarnera soorlu borgmesteriusarnera naalakkersuisuusarnera, akisussaaffinnik annertuunik tigusilluni nammaqataalluni ineriartortitseqataasarnera partiitsinnut isumaqartorujussuuvoq, Aqqaluaq B. Egede oqarpoq.

Asii Chemnitz Narupip oqaaseqartinniarsarinera KNR-imut periarfissaasimanngilaq, taannali sinniisussami Inatsisartuni politikkikkut suliaqarnermik ukiup tulliani qinersinnginnermi periarfissinnissaa pissutigalugu tunuarluni Sermitsiaq AG-mut oqaatigaa.

- Inatsisartut ukiakkut ukiumilu ataatsimiinneranni aalajangigassat siunissamut atorneqartussat pingaaruteqartoq arlaliupput. Nukiit nutaat atorneqartariaqarput, taanna tusagassiuutinut oqarpoq.

Juliane Enoksen sinniisutut Inatsisartunut iserpoq.