Asii Chemnitz Narupip qisuariarnera ajuusaarutigaa

maajip 05-at 2006 10:40

Danmarkimi nakorsaq nunatsinni avatangiisit peqqinnitsinnut sunniuteqartarnerisa misissuiffiginissaanut ilisimatusarfissamik Ålborgimi pilersitsisimasoq ippassaq Radioaviisimi ilanngupparput, tamanna Peqqinnissamut Naalakkersuisumit mamaagineqisoq ullaaq aamma tusarliupparput.

Peqqinnissamut naalakkersuisup Asii Chemnitz Narupip qatsulluinnarnerarpaa avataaniit ilisimatusarfigineqartuarnerput .

Ålborgimi ilisimatusarfimmik pilersitsisup Stig Andersenip uggorinerarpaa Asii Chemnitz Narupip qisuariarnera.

Ilisimatusarfimmi pilersinnialeramikku Asii Chemnitz Narup allakkatigut ilisimatereersimanerarpaa, nunatsinnilu Peqqissutsimik Misissuisoqatigiinnit aningaasanik tapiiffigineqarsimallutik, unammillertutullu isigineqaratik taperserneqarsimallutik. Tapiissuteqartut, tapersersuisullu Peqqinnissamut Qullersaqarfimmi atorfeqartuupput.

Stig Andersenilli aningaasanik qanoq amerlatigisunik tapiiffigineqarsimanertik taanngilaa, suleqatigiinnissarli pingaarnerutikkini.

Ilisimatusarfissaq nunatsinni Peqqinnissaqarfimmit tapiiffigineqartarnersoq Peqqinnissamut Naalakkersuisumut, Asii Chemnitz Narupimut, apeqqutigerusussimagaluarparput, iluatsitsinatali.