Asii Chemnitz Narupip Naalakkersuisut quarsaarutigai

Naalakkersuisut oqimaaqatigiissitsineq pingaartippaat. Aappaagumut aningaasanut inatsisissatut siunnersuutip tamanna qulequtaraa, aningaasaqarnermulli naalakkersuisup Vittus Qujaukitsup siunnersuutaa Kommuneqarfik Sermersuup borgmesterianit Asii Chemnitz Narupimit illuatungilerneqarpoq.

Illuatungeriit isumaqatiginninniarnerit aqqutigalugit aalajangersaaqatigiittarnerat naalakkersuisuninngaanniit atorunnaarsinneqartoq, Asii Chemnitz Narup oqarpoq, imatullu itisilerlugu:

- Quarsaarnarpoq, aamma upperiuminaappoq. Taamatut oqarpunga pissutigalugu kommuninut ataatsimoortumik tapiisutit aalajangersimasorujussuarmik periuseqarluni agguataarneqartarmata. Modeli taanna 2009-minngaanneerpoq. Aamma kommuninut ataatsimoortumik 2014-imut tapiissutissat aningaasaqarnermut naalakkersuisoq Kanukokallu siulittaasua ukioq manna juulip pingajuani atsioqatigiissutigivaat. Taamaattumik periuseq una tupinnarluinnarpoq, Kommuneqarfik Sermersuumi borgmesteri Asii Chemnitz Narup oqarpoq.

Kommuneqarfik Sermersuumut ataatsimoortumik tapiissutit 20 millionit koruuninik ilanngarneqarnissaat, naalakkersuisut siunnersuutigaat, aningaasallu takku kommuninut allanut tunniunneqartussanngortinneqarlutik.

Kommune Kujallermut ataatsimoortumik tapiissutit 8 millionit koruunik ilaneqarput, Qaasuitsullu Kommunianut tapiissutit 12 millionit koruuninik ilaneqarlutik. Aningaasat taakku 20 millionit koruunit tassa Kommuneqarfik Sermersuumit aaneqartussatut siunnersuutigineqarput.

Kommuneqarfik Sermersuullu nammaqataarusunngitsutut oqaatiginiarneqarnera ilumuunngitsoq, Asii Chemnitz Narupip oqaatigaa, kukkusumik paasissutissiisoqarsimanerarlugu:

- Uagut 20 millionit koruuninik imaaliallaannaq akuerseqataasinnaasimanngilagut, peqataarusussimanata, piumanerugatsigu kissaatigalugulu soorunami tunngaviit erseqqissut aamma kisitsisitigut paasissutissat tutsuiginartut tunngavigalugit aalajangersaasoqassasoq. Uani nalaatsornerinnarmik isikkulimmik kisitsimmik taasisoqarnera uagut peqataaffigerusussimanngilarput, Asii Chemnitz Narup oqarpoq.

Naalakkersuisut kommunit 2014-imut ataatsimoortumik tapiissutissaannut atatillugu isumaqatigiinniarnermi Kanukoka kommuninut tapiissutit agguaannerisa allanngornerat pillugu isumaqatigiissuteqarfiginiarsimagaluaraat, Kanukokalli siulersuisuisa tamanna pillugu isumaqatigiissuteqarfigineqarsinnaasimanngitsut, Vittus Qujaukitsup tusagassiutinut nalunaarummi ilaatigut oqaatigaa, Kommuneqarfik Sermersuup ataatsimoortumik tapiissutit agguaanneqartarnerat pillugu allannguutit akueriumasimanngimmagit.

Kommunit pingasut borgmesterii kommuninut aningaasanik agguaassisarneq pillugu Naalakkersuisunut isumaqatigiinniarnerit kingorna saaffiginnissuteqarsimapput, aningaasallu Kommuneqarfik Sermersuumit aaneqartussatut siunnersuutigineqarlutik.