Asii Chemnitz Narupip inatsisartut suleriaasiat nutarterneqartariaqalersoraa

Inatsisartut ukiaanerani ataatsimiinnerat ullumi naggataamik ingerlanneqarpoq. Ataatsimiinerup aallartinnerani oqaluuserineqartussat arlaqartut upernaamut kinguartinneqarput. Inuit Ataqatigiit sinnerlugit inatsisartunut ilaasortap, Asii Chemnitz Narupip, inatsisartut suleriaasiat nutarterneqartariaqalersoraa.
Allattoq Oline I. Olsen
novembarip 14-at 2007 15:21

- Siullermik oqaatigissavara, Ombudsmandip nalunaarusiamini arlaleriarluni maluginiartaqqummagu uagutsinnut, pisussaaffeqaratta aamma inatsisartutut pitsaasunik inatsisiliornissamut, taavalu taakku qulakkeerniarlugit suleriaatsivut aamma qiviaqqittariaqarivut, Asii Chemnitz Narup oqarpoq, nammineq oqariartuummut isumaqataavoq, inatsisartullu suleriaasiat tunngaviatigut nutartertariaqalersoraa.

-Ittangasorujussuanngorpoq, suleriaaserput, ingerlaariaaserput, Landsrådetoqqat nalaanili suleriaatsit ingerlappavut, Asii Chemnitz Narup oqarpoq.

Inatsisartut naggataamik ukiaanerani ataatsimiinnerminni sulianik amerlasuunik pingajussaaneerinnillutik sukkasuumik sulipput, suliat iluamik ingerlanneqarsinnaappat?

- Amerlasuut massakkut aappassaaneerneqarlutillu pingajussaaneerneqarput, ataatsimiititalianeereeraangamik, taava isumaqarpunga tassuunakkut qulakkeerneqartartut partiit isummersoqatigiillutillu itisiliillutillu sulisinnaasut, kisianni allatigut qarsupittorujunngoriataartarpugut, taamaammat uanga nammineq oqaluuserisassanngortinnikuusakka sisamat upernaamut kinguartippakka, Asii Chemnitz Narup oqarpoq.

Taanna isumaqarluinnarpoq inatsisartut suleriaasiat allanngortinneqartariaqalersoq.

- aamma siunnersuutissarpassuaqarpugut, aamma siulittaasoqarfik aqqutigalugu, neriuppunga upernaamut inatsisartut ataatsimiinnerisa nalaani taanna tamattaalluta oqaluuseralugulu aaliangersaaffigisinnaassagipput, soorlu oqareernittuut, Landsrådetoqqap nalaanili ataatsimiittarpugut, imatut paasillugu, ukiumut marloriarluta naapittarpugut, taava unnuaarulluta sulisarpugut, qaammatit arlariit, ilaquttagut puigorlugit, qinersisartut puugorlugit, tamanna peqqinnanngilaq, taamaammat isumaqarpunga ukioq naallugu sulinissaq piviusunngortariaqalersoq, Asii Chemnitz Narup oqarpoq.