Asii Chemnitz Narup uparuarneqaqqippoq

Peqqissutsimut avatangiisinullu Naalakkersuisoq,

Asii Chemnitz Narup, Naalakkersuisutut sulinerminut atatillugu, inatsisartuni ilaasortanit sapaatip akunnerani uani uparuartorneqalaavippoq. Siullermik pingasunngormat, Inuunerittamik taasap suliarineqarnera, Peqqissutsimut Ataatsimiititaliamit naammagineqarani kinguartinneqarpoq. Inatsisartuni Eqqissisimatitsinermut Avatangiisinullu Ataatsimiititaliami Siumut sinnerlugu ilaasortat naalakkersuisoq maanna aamma apeqquserpaat.

Inatsisartuni Eqqissisimatitsinermut Avatangiisinullu Ataatsimiisitaliami ilaasortat, immikkut ittumik ippassaq ualikkut ataatsimiigiaqquneqarput. Siumumeersut marluk, tassaasut Vittus Mikaelsen aamma Kim Kielsen isumaqarput, Avatangiisinut akitsuutit pillugit pisortaqarfiit akimorlugit suleqatigiissitamik pilersitsiniarluni inatsisartunut neriorsuutini, Naalakkersuisup upernaaq manna eqquutsissimanngikkaa.

Naalakkersuisooqataasut IA-meersut Siumumit sapaatip akunnerani uani aatsaat uparuarneqalinngillat.

Inatsisartuni pingasunngormat ataatsimiinnermi, Inatsisartut Peqqissutsimut ataatsimiititaliaata siunnersuutaat aappassaaneerneqartussanngorlugu inatsisartuni eqqartorneqartussaagaluaq kinguartinneqarpoq. Aamma inatsisartut upernaaq manna ataatsimiinneranni Asii Chemnitz Narupip tatiginanngitsutut taasissutigineqarnissaa Atassutip piumasarigaluarpaa.

Taama pisoqalermat, IA-p taamani siorasaarutigaa, naalakkersuisooqatigiinnermiit tunuarnissaq. Naalakkersuisut siulittaasuata Hans Enoksenip taama pisoqarmat Atassut inissippaa, naalakkersuisooqatigiinnerlu nanginneqaqqilluni.

Maanna qanoq pisoqassanersoq kisimi apeqqutaalerpoq.

Asii Chemnitz Narup pisoq pillugu oqaaseqartinniaraluaratsigu iluatsinngilarput.

Inatsisartut suliakkiissutaat suliarineqarsimanngimmat Atassummiit tikkuarparput, Atassut sinnerlugu ataatsimiititaliami ilaasortaq Emilie Olsen oqarpoq, taamaasillunilu Asii Chemnitz Narupip arriippallaamik suliniartarnera uparuarlugu.