Asii Chemnitz Narup: Pitsaasumik eqqaamioriinnissaq pingaaruteqarpoq

Illoqqortoormiut kangerlussuata avannaani, Maqqaalaami, aatsitassamik Molybdæn-imik piiaasoqalerpat, Illoqqortoormiuni innuttaasut sulisorineqarnissaat kissaatigineqarpoq, missisueqqissaarnissamut piiaanissamullu akuersisoqartinnagu kommuneqarfinngortussap Sermersuup oqaloqatigineqarnissaa Ikaarsaariarnermut Ataatsimiititaliap siulittaasuata Asii Chemnitz Narup kissatigaa.
Allattoq Louise M. Kleemann
aggustip 18-at 2008 07:05

- Pitsaasumik eqqaamioriinnissaq qulakkeertariaqarpoq. Isertuaatsumik oqaloqatigiittarnissaq, ilisimasanik paarlaasseqatigiittarnissaq, aammalu piujuartitsineq siunertaralugu ineriartortitsinissaq pillugit oqaloqatigiittarnissaq pingaaruteqarpoq, Asii Chemnitz Narup oqarpoq.

Illoqqortoormiormiut aatsitassarsiornissami sulisalernissaat kissaatigaajuk?

Aatsitassarsiorfiliornissap Illoqqortoormiormiuinut iluaqutaanissaa qulakkeerniarneqassaaq, minnerunngitsumik ilinniartitaanikkut aningaasarsiornikkullu periarfissat eqqarsaatigalugit. Kommunerujussuanngortussap oqartussaaqataanissaa aamma pingaaruteqarpoq, tamanna siunissami pissusissamisuuginnartutut isumaqarfigivara, taamaattumik tassuunatigut nutaaliortariaqalerpugut, Asii Chemnitz Narup oqarpoq.

Aatsitassamik Molybdæn-imik piiaanissaq pillugu Illoqqortoormiuni innuttaasut unnugu ataatsimiisinneqassapput. Ikaarsaariarnermi ataatsimiititaliap siulittaasua Asii Chemnitz Narup, aningaasaqarnermut ataatsimititaliami ilaasortat marluk peqatigalugit pingasunngorpat Illoqqortoormiunukassapput, tamatumalu kingorna aatsitassassiorfimmit Quadra Mining-imeersunik ataatsimeeqateqassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq