Asii Chemnitz Narup: Nalimmmassaarineq kommunimi sulisunik eqquisinnaavoq
Kommuneqarfik Sermersuup kommunit akileraarutitigut isertitaannik nalimmassaarinermi maannakkumornit suli amerlanerusunik akiliissasoq, kommunalbestyrelsemi ilaasortanut tamanut erseqqissigaluttuinnarpoq.
Kommunimi sulisut innuttaasullu sullinneqarnermikkut eqqugaassasut, Kommuneqarfik Sermersuumi borgmesteri, IA-meersoq Asii Chemnitz Narup oqarpoq.
- Kommunalbestyrelsemi ilaasortat 19-iusut tamarmik isumaqatigiilluta naalakkersuisut siunnersuutaat kingulleq agguaasseqqinnissamut tunngasoq itigartipparput, Asii Chemnitz Narup oqarpoq.
Taanna aasaanerani sulinngiffeqaleruttorfimmi akunnattoorneq pillugu ilaasortanik ataatsimiigiaqqusivoq. Ilaasortat partiit akimorlugit isumaqatigiillutik ippassaq kissaatigaat, nalimmassaarinermi maanna aaqqissuussineq 2015-imi atuutissasoq, erseqqissaallutilli Kommuneqarfik Sermersooq nalimmassaarinermut amerlanerusunik tunniussaqarusuttoq.
Tamatumunngali suut kingunerussanersut misissorneqaqqaartariaqartut, borgmesteri nassuiaavoq.
AAMMA ATUARUK Borgmesteri immikkut ittumik ataatsimiigiaqqusivoq
Aningaasaqarneq pillugu siunnersuisartunit, BDO-mit, pappialani ataatsimiinnermi ilanngullugit atorneqartuni erseqqissarneqarpoq, siunissami kingunerujumaartut ilisimaneqanngitsut, allassimalluni, nalorninartortaqaqisut missingersuutillu ukiualuit qaangiuppata allanngorsinnaasut.
- Akileraarutitigut procenti maannakkut atuuttoq qaffakkusunngilarput, aammalu sanaartugassanut illuarteriikkavut mangiarusunngilavut, borgmesteri oqarpoq.
Kommunimi sulisut eqqugaanerpaassapput
Kisianni taava Kommuneqarfik Sermersooq 56 millionit koruuninik akiliissappat, kikkut eqqorneqarnerpaassasut, borgmester Asii Chemnitz Narupip siulittuutigissallugu qulanngilaq.
- Periarfissat tassaapput kiffartuussinitsinni pitsaassutsimik apparsaaneq, aappaatut sulisorisarpassuatta ilaannik soraarsitsinissaq.
- Qularutigineqassanngilaq, sipaarniuteqarnissarput Tasiilami Illoqqortoormiuni, Paamiuni nunaqarfitsinnilu tamani eqquinerluttorujussuussammat. Taamatut oqarpunga pissutigalugu, taakkunani ukiuni sisamani qaangiuttuni nalimmassaarillutalu pitsaassutsimik qaffassaasimasorujussuuvugut, innuttaasunik kiffartuussineq eqqarsaatigissagutsigu, Asii Chemnitz Narup oqarpoq.
