Asii Chemnitz Narup Naalakkersuisutut ataqqarpoq
Peqqissutsimik Avatangiisinullu Naalakkersuisup Asii Chemnitz Narup-ip naalakkersuisutut issiaannarsinnaanera akunnerni makkunani Inatsisartuni aalajangiivigineqartussanngorpoq.
Naalakkersuisup issiaannarsinnaaneranut apeqqut aallaaveqarpoq Inatsisartut Kukkunersiuinermut Ataatsimiititaliaanit Asii Chenmitz Narup-ip 2004-mi Ilaqutariinnermut Naalakkersuisutut inissisimanermini 13 millioni koruuninik atuivallaarsimanerminik kingusinaarluni Inatsisartunut nalunaaruteqarsimanera pissutigalugu, ualimut nalunaaqutaq pingasunngoriitsiartoq Demokraatiniit Palle Christiansen Inatsisartut ataatsimiittarfianniit Naalakkersuisut siulittasuannut Hans Enoksen-imut piumasarimmagu Asii Chemnitz Narup naalakkersuisutut tunuartinngippagu tatiginninnginnermik nalunaaruteqarniarlutik.
Akunneq ataaseq qaangiuttoq Asii Chemnitz Narup Inatsisartut oqaluttarfianniit oqarpoq Naalakkersuisutut tunuarniarnani:
-Tassa naalakkersuisutut akisussaaffinnik uanga sumiginnaasimannginnama. Eqqortittuaannarsimavara 15. september 2003-mili, Asii Chemnitz Narup oqarpoq.
Naalakkersuisoq aamma oqarpoq ilassutitut aningaasaliissutissanik qinnuteqartoqaraangat eqqumaffigineqartartoq aammalu pissusissamisoortoq. Eqqaamaneqaqaqquaa decembarimi aningaasat aningaasaqarnermut ataatsimiititaliamit akuersissutigineqarmata, taamalillunilu matu putusoq, mannalu oqamaaqatigiissunik regnskabinik saqqummiussilluni, aningaasallu oqimaaqatigiissut.
Asii Chemnitz Narup naggataagut aperigatsinni unnugu Naalakkersuisutut ataannassanersoq akivoq.
-Aap.
Tallimat qeqqartoq Inatsisartut ataatsimiittarfianniit partiit ataatsimiigiarput.
Kuupik Kliest oqarpoq Asii Chemnitz Narup-ip issiaannarnissaa Inuit Ataqatigiit tamarmiusut tapersersoritsik:
-Inuit Ataqatigiinninngaanniit ikinnerussuteqarluta ullumi oqaaseqaateqarnitsinni taamatut inerniliisoqarnera akerleralugu nalunaarutigaarput isumaqatiginagulu, taamalillutalu oqaatigaarput Naalakkersuisumut tunuaqqusineq toqqammivissaqanngitsoq, Kuupik Kliest oqarpoq.
Nalunaaqutaq tallimat qaangeraa partiit matoqqasunik ataatsimiiffimminniit Inatsisartut ataatsiimiittarfiannut utermata Naalakkersuisut siulittaasuat Hans Enoksen oqaluttarfimmiit oqarpoq naalakkersuisut tamarmiusut isumaqatitgiissutigisaannik aalajangertut Asii Chemnitz Narup Naalkkerusisuuginnassasoq.
Hans Enoksen-ip naalakkersuisutt isumaqatigiilluinnarnerannut oqarneranut pissutaasimassaaq Inatsisartut Kukkunersiuinermut Ataatsimiititaliaanut siumut sinnerlugu ilaasortat tassaasut Kim Kielsen aamma Otto Jerinmiassen Asii Chemnitz Narup-imut isornartorsiuisut ilagimmatigik.
Nalunaaqutaq arfininngoriitsiartoq Palle Christiansen-ip tatiginninnginnermik nalunaarutiginninnerigalua Siumumeersup Lars-Emil Johansen-ip inatsisartut suleriaasianni paragraf 51-imi aalajangersarneqartoq malillugu tatiginnikkunnaarnermik taasisitsinissamik saqqummiisoqarmat nalunaarutigaa, Siumut, Inuit Ataqatigiit Atassutillu Inatsisartuni ilaasortaatitaat pisinnaatitaaffitsik malillugu allamik aalajangiisoqarnissaa siunnersuutigaat, taamalu Asii Chemnitz Narup Naalakkersuisunit tunuarnissaanik illuatungiliuttunit piumasaagaluaq pinngitsoortillugu.
Atassummeersoq Ellen Christoffersen kisimiilluni taaseqataanngilaq.
