Asii Chemnitz Narup (IA) marlunngornermii ullaakkut nalunaarpoq Kommuneqarfik Sermersuumi borgmesteritut ingerlaannartumik atuutilersumik tunuarluni. Sivisuumik Demokraatinik aporaattarnerup kingunerisaanik tamanna pivoq. Assi: Kommuneqarfik Sermersooq

Atuagaq tungujortoq: Asii Chemnitz Narup - isumaginninnermut siunnersortimiit nuannarineqaqaluni borgmesterimut

Kommuneqarfik Sermersooq ukiuni qulit siuttuuffigereerlugu Asii Chemnitz Narup (IA) borgmesteritut ingerlaannartumik atuutilersumik tunuarpoq.

Qinersinermi taaguunneqarnerpaaq. Inuit Ataqatigiinni siulittaasup tullerisimasaa. Arnat qimarnguiannik pilersitseqataasoq Kommuneqarfik Sermersuumilu ukiuni qulini borgmesteri.

Asii Chemnitz Narup ukiorpassuarni politikkikkut suliaqarpoq, suliarisimasaatalu ilai ataani atuarneqarsinnaapput.

Ukiut: 64-inik ukiulik. Nuummi juunip 27-ani 1954-imi inunngorpoq.

Inuttut inissisimaffik: Juaaka Lyberth uigaa, erneqarlunilu paneqarpoq.

Ilinniakkat: Hellerup Gymnasiumimit ilinniarnertooq. Den Sociale Højskole i Københavnimi isumaginninnermi siunnertortitut ilinniarnini 1981-imi naammassivaa. Aamma Ilisimatusarfimmi Kulturi Inuiaqatigiillu ilinniarpai (1989) kiisalu alisuuteqartunik ajornartooqqasunillu katsorsaasoq (1996-98).

AAMMA ATUARUK IA Demokraatillu imminnut pisuuteqattaatilersut

Inuussutissarsiornermi misilittagai: Nuummi Arnat Suleqatigiivini pilersitseqataasoq suleqataasorlu, 1981-imit 1986-imut.

- Isumaginninnermi siunnersorti, Nuup Kommunea.

- Inuusuttunut angajoqqaajusunullu imigassaq pillugu paasisitsiniaanermut atatillugu PAARISA-mi pinaveersaartitsinermik suliaqarneq (1990).

- KNR-ip aallakaatitassiaani “Aperilaarlanga”-mi aaqqissuisoq.

- Isumaginnittoqarfimmi peqqinnissaqarfimmilu sulisunik ilinniartitsineq nakkutilliinerlu.

- Nuummi inersimasunik aliasuuteqartunik ajornartooqqasunillu katsorsaaneq aliasuuteqartunillu suleqatigiiffimmi pisortaq. 

- Kalaallit Nunaanni AIDS pillugu aningaasaateqarfimmi siulittaasup tullia. 

Politikkikkut ingerlanera: 1999-imi IA sinnerlugu Inatsisartunut qinigassanngortippoq qinigaallunilu.  

Ukiut pingasut qaangiummata qinigaaqippoq. Ilaqutariinnermut peqqissutsimullu 2003-miit 2005-imut Naalakkersuisuuvoq aamma peqqissutsimut avatangiisinullu 2005-imiit 2006-imut Naalakkersuisuulluni - tamarmik Hans Enoksenip siulittaasuunerani pipput. 

Kisianni peqqissutsimut avatangiisinullu Naalakkersuisutut tunuarpoq, 'suleqatiminit malersorneqartutut' misigisimagami, KNR 2006-imi allappoq.

2007-imi Inuit Ataqatigiinni siulittaasumut tullinngorpoq.

AAMMA ATUARUK Asii Chemnitz Narup er klar til borgmesterpost

2008-imiit Asii Chemnitz Narup Tunumi Kitaanilu Kommunimut ikaarsaariarnermi ataatsimiititaliamut siuttuuvoq kommunillu pillugit aaqqissuusseqqinnerup kingorna qinersisoqaqqaarmat Kommuneqarfik Sermersuumi borgmesteritut qinigaalluni. 

Qinersinermi taaguunneqarnerpaalluni qinigaavoq, tassa 994-init taaneqarsimagami. Taamaalilluni Siumut taamani Nuup Kommuneaasimasumi borgmestereqartitaaruppoq. 

Taassuma kingorna Asii Chemnitz Narup marloriarluni qinigaaqqippoq. Qinersinerni taakkunani tamatigut Nunatsinni taaguunneqarnerpaasarpoq. 

2013-imi kommunimut qinersinermi 1.337-init taaneqarpoq - kommuninut qinersinermi kingullermi 2017-imi taasisai amerleriarput 2.259-inngorlutik.

AAMMA ATUARUK Asii Chemnitz Narupip isornartorsiuisoqarnera tupigusuutigaa


Kilder: Valg.gl, Sermersooq.gl, Asii Chemnitz Narups facebookprofil, KNR

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat