Asii Chemnitz Narup inuussutissarsiornermut politikkip ineriartortinnissaanut isumassarsiortoq

Naalakkersuisut aningaasanut inatsisissatut siunnersuutaat inuussutissarsiornermut tunngasunut suliniutinik amigaateqartoq Sulisitsisut isumaqarput. Aningaasaqarnermut naalakkersuisup ilumoornerarpai.

Taamaammat Inuit Ataqatigiinnit Asii Chemnitz Narup oqallinnissamut qaaqqusivoq.

Sulisitsisut aningaasanut inatsisissamut siunnersuummi inuussutisarsiutinik ineriartortitsineq amigaatigivaat. Inuussutissarsiutinik ineriartortitsinissaq siunnersuummi naammattumik ilannguppisiuk?

- Naamik, taamaattumik saqqummiigama aamma taamatoqqissaaq oqarpunga: aningaasarsiornikkut annertusaasariaqarpugut, taamaattumik allaanerusumik annertunerusumillu ullumikkorniit iliuuseqartariaqarpugut, naalakkersuisoq KNR-imut oqarpoq.

Asii Chemnits Narupip Naalakkersuisut aningaasaqarnikkut ataavartumik inerisaanissaq aningaasanut inatsisissatut siunnersuummi ukkatarigaat erseqqissaatigaa.

- Taamaattorli eqqaasitsissutigissavara attassinissamut aamma siuariartornissamut nutaamik pilersaarusiornerput. Taamaammat tassunga ilanngullugu inuussutissarsiornikkut annertoorujussuarmik sammisussaagatsigu.

Aningaasarsiorneq annertusarneqassasoq

Nunatta aningaasaqarneranut ikorfartuutaasinnaasunik pilersitsinissaq Naalakkersuisut anguniagaraat. Nunatta karsianut isertitat 55 procentii Danmarkimi naalagaaffiup ataatsimoortumik kapiissutaanneersuupput 5 procentillu EU-mi isumaqatigiissutineerlutik.

- Nunatta karsia aningaasanik amerlanerusunik immertariaqarparput, uagut nunatsinni assaat tamaasa atorfissaqartippagut. Taamaammat eqqarsaqatigiittariaqarpugut, qujavunga Sulisitsisukkormiut isummersorlutik aallartereersimammata, oqaloqatigiissutissaqaqaagut, tamatta suleqatigiinnikkut kivitseqatigiittariaqarpugut, Asii Chemnitz Narup oqarpoq.

AAMMA ATUARUK Asii: Aningaasatigut namminiilernissarput suli ungaseqaaq

Sulisitsisulli aningaasaqarnikkut ineriartortitsinermut ajoqutaasinnaasorisaannik Naalakkersuisut suliniutaat arlallit isornartorsiornikuuaat.

Tassa aatsitassarsiornermi uranimut qinngornernillu ulorianartunik akulinnut allanut naaggaarluinnarnissamut inatsisissatut siunnersuut kiisalu Naalakkersuisut nunat tamalaat Parisimi silap pissusia pillugu isumaqatigiissutaannut ilanngunniarnerat.

Sulisitsisuttaaq Naalakkersuisut uuliasiornermik unitsitsinerat kiisalu tammajuitsussarsiniarluni piniarnermut unitsitsinerat aamma isornartorsiornikuuaat.