Asii Chemnitz Narup: Eqqarsaqatigiit aningaasartuutaavallaarnavianngillat

Peqqinnisaqarfiup Ileqqussat pillugit Eqqarsaqatigiivisa peqqinnissaqarfimmut aningaasartuutaavallaaannginnissaat anguniarneqarsimasoq, Peqqinnissamut naalakkersuisoq Asii Chemnitz Narup Demokraatit sinnerlugit inatsisartuni ilaasortap Jens B. Frederiksenip apeqquteqaateqarneranut akissummini allappoq.

Ileqqussat pillugit Eqqarsaqatigiinni kigutilerisuninngaanneersoqannginnera Demokraatinit maluginiarneqarsimasoq, Jens B. Frederiksen allappoq, Asii Chemnitz Narupillu akissummini allappoq peqqinnissaqarfiup suliassaqarfiinit tamanit ilaasortanngortitsisoqarsinnaasimanngitsoq.

Ileqqussat pillugit Eqqarsaqatigiinni ilaasortassat 13-iusut akissarsiaqarnavianngillat, oqallittarnerillu amerlanerit internetitigut ingerlanneqartartussaallutik. Ukiumut ataasiaaannarluni imaluunniit marloriaannarluni naapittoqartarnissaa siunnerfigineqarpoq, taamaaliornikkut aningaasartuutaasussat 50.000-it 80.000 koruunillu akornanniissallutik.