Asii Ch. Narup: Sooq Kanukoka uannut saaffiginninngila

Napparsimasut paaqqutarisariallit napparsimavinniitinneqarnerinut Peqqissutsimut pisortaqarfiup kommuninut qaffaanera pillugu Kanokokap siulittaasua sakkortuumik ammasumillu Hans Enoksenimut uparuaavoq.

Taanna ilaatigut allappoq, Peqqissutsimut pisortaqarfimmi atorfillit pingaakujullutik Kanokokamut itigartitsisimasut. Tamanna pillugu Peqqissutsimut naalakkersuisoq Asii Chemnitz Narup ima oqarpoq.

- Miserratigissanngilara uissuummissutigingaatsiarakku sooq uannut Kanukokap siulittaasua toqqaannartumik saaffiginneqqaarsimannginnersoq. Tassami uannut saaffiginnittariaqarsorisimagaluarpara peqqissutsimut naalakkersuisutut akisussaasuugama. Lars Karl Jensenip nammineq soorunami periusissani aalajangertussaavaa taamaattorli tupigeqaara, Asii Chemnitz Narup oqarpoq, nangipporlu:

- Marlunngornermut ataatsimiigiaqquara Peqqissutsimi pisortaqarfimmi pisortat ataatsimeeqatigaakka aammalu uanga qinnutigisimavara Lars Karl Jensen qaaqqussagipput atorfilittaalu, oqarpoq.

Aperaarput sooq akit qaffannissaat sioqqulluguli oqaloqatigiissimannginnersut.

- Tassa Lars Karl Jensenimik oqaloqateqaleruma malittarisassat assigiinngitsut eqqartortussaassavagut aamma uanga anillariarfissatut ajornartorsiutinik takusinnaasakka pillugit aamma soorunami oqaloqatigiissaagut, Asii Ch. Narup oqarpoq.

Aperaarput qaffariaatit annertungaatsiarmata tassanngaannarlu qaffaasoqarsimanerarlugu oqartoqarmat tamanna qanoq oqaaseqarfigisinnaannginneraa.

- Taannarpiaq soorunami aamma ataatsimeeqatigiilerutta tikissavarput. Maani tusagassiuutit aqqutigalugit isumaqatiginninniarlungalu ataatsimiinneq ingerlakkusunngilara, oqarpoq.

Apereqqipparput sooq kommunit ullut arfineq-pingasuinnaat periarfissinneqarsimanersut.

- Oqaluttuassartaa takivoq, Lars Karl Jensenilu ataatsimeeqatigeereerutta neriuutigaara ataatsimoorluta arlaannik avammut oqaaseqarsinnaassalluta, akivoq.

Aperaarput Kanukoka uparuaasimasoq Peqqissutsimut naalakkersuisoqarfiup atorfilittai pingaakujullutik Kanukokamu akissuteqarsimanerarneqartut, tamannalu qanoq oqaaseqarfigisinnaaneraa.

- Ilisarnanngitsorujussuuvoq uannut tusaavara aamma radioavisimut apersorneqarluni taamatut oqarmat. Sorpassuarnik pasillerneqarlutalu uparuartorneqartarpugut, taanna nutaajullunilu ilisariuminaappoq uannut, Peqqissutsimut naalakkersuisoq Asii Chemnitz Narup oqarpoq.Kanokokap siulittaasua Lars Karl Jensen ammasumik allagaqarluni ilaatigut ima allappoq. “Peqqissutsimut Pisortaqarfiup napparsimasut paaqqutarisariaqartut napparsimavinniitinneqarnerinut akigititanik 300 procentit sinnerlugit qaffaanissamik naalakkiinera inatsisit isumaqatiinninniartarnernillu aaqqissuussinerit atuuttut qissimillannguarnagit pisimavoq.”