Asii C. Narup: KANUKOKAp eqqartuussisunut tunniussiniarnerat pisinnaatitaaffigaat

Innarluutilinnut sullissinermi tiimit ikilisinneqarnerisa kingunerisaanik KANUKOKAp Namminersornerullutik Oqartussat eqqartuussisunut tunniunnialersaarpaat. Ilaqutariinnermut naalakkersuisoq Asii Chemnitz Narup oqarpoq, KANUKOKAp tunngaviusumik pisinnaatitaaffigigaat.

- Eqqaasitsissutigerusuppara ukiuni kingullerni innarluutilinnut aningaasaliissutit sipporneqartarsimammata, taamaammallu piumasarisimavara akuersissutinut pillugit misissueqqissaarnissaq ingerlanneqassasoq, tamannalu siornali aallartinneqarpoq, Asii Chemnitz Narup oqarpoq.

Aamma maleruagassat malinneqarnissaat avaqqunneqarsinnaannginneri erseqqissaatigaa, maleruagassallu malinneqarnissaat.

Asii Chemnitz Narup oqarpoq akuersissutinut tunngatillugu peqqussut misissoqqissaarneqarmat, aappagulu 2006-mi upernaakkut allanngortinneqarnissaanut inatsisartunut saqqummiussissammata.

Innarluutilinnut sullissinermi tiiminik ikilisaanerujussuit pillugit naalakkersuisoq aperineqarami akivoq:

- Kommunit maalaaruteqarnissamut pisinnaatitaaffeqartut, aammalu paasinarsissappat Namminersornerullutik Oqartussat kommuninut akiitsoqartut taava tassanngaaniit alloriaqqittoqassaaq.

Kommunini isumaginninnermi allaffiup pisortai apriilip arfineq pingajuaniit Nuummi pikkorissartinneqassapput, naalakkersuisullu neriuutigaa oqallinnermik paaseqatigiiffiusumik ingerlanneqarumaartoq.