Asii borgmesteriuinnassaaq
Kommunalbestyrelse-nut qinersinermi nunatsinni qinigaanerpaaq, Asii Chemnitz Narup, Inuit Ataqatigiinneersoq, borgmesteritut ingerlaannassasoq maanna qulakkeerneqarpoq.
Tusagassiuutinut nalunaarummi tamanna erserpoq, nalunaarummilu allassimavoq, Asii Chemnitz Narupip Kommuneqarfik Sermersuumi borgmesteriuinnarnissaa Inuit Ataqatigiit Demokraatillu ullumi isumaqatigiissutigigaat.
- Politikkikkut ukiuni sisamani aggersuni sulinissaq pillugu aalajangersimasumik suleqatigiinnissamut maanna isumaqatigiissusiortoqassaaq, Asii Chemnitz Narup allappoq.
- Qinersinermut inernerit ataqqillugit Inuit Ataqatigiit isumaqatiginninniartartoqatigiivi sapinngisamik siammasissumik suleqatigiinnissamik pilersitsiniarsimagaluarput. Siumulli suleqatigiinnermut peqataajumanngimmat tamanna piviusunngorsinnaajumaasimanngilaq, Kommuneqarfik Sermersuumi illoqarfiit pingaarnersaannit tusagassiuutinut nalunaarummi naggataatigut allapput.