Asiaq umiarsualivinni qulini immap itissusaanik uuttortaassasoq

Kangaatsiami, Niaqornaarsunni, Attumi, Ilimanami, Oqaatsuni, Ikamiuni, Kitsissuarsunni, Kangerlummi, Ikerasaarsummi Iginniarfimmilu ukioq manna uuttortaasoqassaaq.

Pisortat sullissinerisa nukittorsarnissaat aammalu isorliunerusortatsinni uuttortaanissamut paasissutissatigut tunngavissat pitsaanerulersinnissaat, Ineqarnermut, Attaveqaasersuutinut Isorliunerusunullu Naalakkersuisup Aqqaluaq B. Egedep ilungersuutigisimallugu oqarpoq.

- Sumiiffinni taakkunani nunami sumiiffinnut teknikkinullu paasissutissat nalunaarsukkat pitsaanerulersinnissaannut periarfissaqarneq suliarineqartussanik pitsanngorsaanerinnaanngilaq — nunarput tamakkerlugu naligiimmik atugassaqartitsinissap ineriartortitsinissamullu periarfissaqarnissaata qulakkeernissaata tungaanut alloriarneruvoq pingaaruteqartoq.

- Tamanna sullissinerup taassuma isorliunerusuni innuttaasunut, uuttortaanermut teknologiimik nutaaliaasumik qarasaasiatigoortumillu pilersaarusiornermik atuisinnaanatik akulikippallaamik inissisimasartunut, atoruminarnerulersinnissaanut tutsuiginarnerulersinnissaanullu suliassatut pingaarnertut isigaara. Taamatut suliniuteqarnermi aalajangiinissamut tunngavissat pitsaanerulersinnissaat, najukkani suliniuteqarnerulersitsisinnaanissaq aammalu pinngortitaq kulturerpullu ataqqillugit piujuartussamik ineriartortitsinissap tunngavissinnissaa kissaatigaarput, Aqqaluaq B. Egede tusagassiutinut nalunaarummi oqarpoq.

Asiap angallataa multibeam ekkolod-imik allanillu atortunik nutaaliaasunik atortulersugaavoq, paasissutissat nalunaarsukkat katersorneqartut qaffasissumik pitsaassuseqarnissaannik eqqoqqissaartuunissaannillu qulakkeerisunik. Asiaq paasissutissanik nalunaarsukkanik katersorneqartunik suliareqqeereerpat pitsaassusaannillu qulakkeerereerpat, taakkua oqartussanut, inuussutissarsiortunut allanullu soqutiginnittunut pissarsiarineqarsinnaalersinneqassapput aammalu paasissutissat nalunaarsukkat umiarsualivinni ilisimasortaqarnermi ilanngunneqassallutik.