Asiap kujasissuani ajunaartut suli amerliartorput

Aasiap Kujataani sapaatip-akunnerini arlalinni siallerujussuarnerata nassataanik inuppassuit ajunaartut amerliartorput, nunavinni illoqarfiit eqqugaanerpaat kiattup anorersuarujussuata monsunimik taaneqartartup sialussuarujussuarmik nassataqartartup eqqugai annaassiniartartunit tikinneqariartortillugit ajunaarsimasut amerliartorput. Inuit sialussuarfiusartuni najugallit Indiami, Pakistanimi, Nepalimi aamma Bangladeshimi najugaqartut kiattup anorersua sialuttaqartaqisoq sungiusimaannaraluarpaat, ukioq mannali sialussuaq ingasavissimavoq.
aggustip 10-at 2007 17:22

Ukioq manna sialussuarujussuarnera ingasavippoq,

ukiorpassuarni taamatut sialussuarsimanngilaq, qarsutsinersuaqarneratigullu inuppassuit pigisaminnik annaasaqarsimasut amerlaqaat, inuttullu atukkamikkut ingerlaqqinniarnerat oqimaattorsiorfioqaaq.

Taama oqaluttuarpoq, allaffimmi pisortaanerugallartoq,

Ilagiit ikiuiniaqatigiivineersoq, Nepalimi Bangladeshimilu, Christer Lindholm.

Sialussuarnerata saniatigut Asiap Kujataa aamma anorersuarnik kaavittuliortunik tornadonik eqqugaasarsimavoq, ukiormannalu siallertuarnerata nassataanik nuna aamma sisoortarsimavoq, maannakkumuugallartoq inuit 500-it ajunaarsimapput,

Inuillu 19 millionit silarlorujussuarnerata nassataanik eqqugaapput. Nunaannarni illoqarfiit erngup qarsuteqqavai inuillu pigisaat kuugussaasarsimallutik.

Illullu inuttai qattunernut qimarrassimapput.

Eqqugaanerpaallu tassaapput inuit pissakinnerit kuuit sinaanni najugaqartut, allani najugassaqannginnertik pissutigalugu. Kuuit sinaanni najugalippassuit illut najugaat kuugussaasarsimapput, nersutaatituannguatillu annaasarsimallugit, allatullu aningaasarsiutissaqaratik.

Silassuarujuarnerata nassataanik qarsutinersuup aamma nassataraa inuit minguittumik imissaqannginnerat.

Nunat tamat ikiuiniaqatigiiffissuisa maannakkut annilaanngatigilerpaat, nappaatit; malaria, nasserinersuullu siaruakkiartulernissaa.

Asiami taamatut sillerujussuarnerata kingunerissanik nunat atsinnerusumiittut qarsutsinersuaqarfiusar-simapput, siunissamilu suli qarsutsiffiusarumaarlutik.

Nunat Peqatigiit ikiuiniaqatigiiffianni ataqatigiissaari-suusup, Margareta Wahlstrømip, oqarnera malillugu, nunarsuatsinni inuit milliardit affaat ukiut tamaasa qarsutsinersuaqarneratigut eqqugaasarput. Siunissamilu qarsutsinersuaqartarnera ajornerujartussaaq.

2004-miit 2006-imut qarsutsinersuaqartarnera ukiumut 60-miit 100-mut qaffariarsimavoq, ukioq mannalu kisitsit 70-imiilereersimavoq, qarsutsinerit Afrikami Asiamilu ingammik pisarsimapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq