Asfaltiliuut nutaaq pujoralatserusaarpoq

Qaasuitsup Kommuniani aqqusinerni angallattut ilimagisinnaanngilaat piffissami qaninnermi illoqarfiit aqquserngisa nungullarsimaqisut nutaanik asfaltilerneqarnissaat. Asfaltiliuut nutaaq uninngaannarpoq avatangiisinut akuersissutip tunniunneqarnissaa qaammatip aappassaa utaqqillugu.
Allattoq Noah Mølgaard
aggustip 15-at 2012 07:48

Qaasuitsup Kommunia nutaarluinnarmik asfaltiliuuteqarpoq 10-11 millioner koruuninik akilimmik. Misileraallunili asfaltiliorneq juuli aallartilaartoq unitsinneqarpoq avatangiisinut akuersissummik peqartoqanngimmat.

- Avatangiisinut akuersissut suli pissarsiarinngilarput. Maanna aarleqqutigilerparput ukiormanna nutaamik asfaltilersuinissap kingusinnaareernissaa maannami pueqqortinnera malunnarsilluareerpoq, borgmester Jess Svane KNR-mut oqarpoq.

Qaasuitsup Kommuniani aqquserngit maniillutillu itersaqaqaat. Biilertut ilaatigut sangusaartariaqarparput biilitik qajassuunniarlugit.

Siornatitut Ilulissat kommuniat asfaltiliuuteqarpoq maanna nutaamik taarserneqartumik. Asfaltiliuut nutaarsuaq Qaasuitsup Kommuniani illoqarfinnut allanut asfaltimik pilersuisinnaasussagaaluarpoq aammalumi misileraalluni asfaltiliulereeraluarluni ikkussorneqarluni juuni naanerani piareerami.

Kommunep naatsorsuutigisimagaluarpaa avatangiisinut akuersissut asfaltiliuutitoqqamut atortut atorlugu asfaltiliorneq ingerlaqqissinnaassasoq.

Pinngortitamut Avatangiisinullu naalakkersuisoqarfik nalunaarpoq avatangiisinut akuersissummut qinnuteqaat Namminersorlutik Oqartussani allaffissornikkut suliarineqarpoq. Kisianni tassa asfaltiliortoqarsinnaanngilaq avatangiisinut akuersissut tunniunneqarsimatinnagu.

- Oqareernittut misileraalluta asfaltiliulersimagaluarpugut aamma asfaltiliuummik sanasut immikkut ilisimasallit Ilulissaniissimagaluarput ilitsersuiartorlutik. Misileraalluta asfaltilioreerutta kommune tamakkerlugu aqquserngit iluarsaannissaannut pilersaarut sukumiinerusoq aatsaat suliarisussaagaluarparput, Jess Svane oqarpoq.