Asfalti isugutattoq Tasilaami innuttaasut qatsuppaat

- Asfalti maanna atorneqartoq allaanngilaq iluamik issorsinnaanngitsoq. Siallersimagaangat kussiamut kuulersarpoq, soorlu aamma aqqusinikkut kuulersartoq, Gerda Vilholm, Tasiilami innuttaasut ilaat oqarpoq.

Aqquserngit putoqaraangata asfalti atorlugu matuniarneqartarput, asfaltilli matumani atorneqartup iluamik issorsinnaannginnera pissutaalluni imerpalasunngorluni kuulersarpoq.
Taamaaligaangami biilinut atisanullu serparsinnaasarpoq:

- Asfalti biilit saneraannut serpalittarpoq nippullunilu, niuleraannilu atisanut aamma pisinnaasarluni, Gerda Vilholm oqarpoq.

Taanna Tasiilami atuagaarniarfeqarpoq. Pisiniat atuagaarniarfimmut isernialeraangamik asfalti kuuginnartoq aqqusaaqqaartariaqartarmassuk Gerda pallemik ikaartarfiliortariaqarsimavoq.
Asfalti atuagaarniarfip iluanut kalinneqannginniassammat taamaaliorpoq. Aqqusineq sapaatip akunnerata ataatsip matuma siornatigut asfaltilersorneqarpoq, Gerda Vilholmillu misissoramiuk paasivaa suli issorsimanngitsoq.
Innuttaasut taamaattumik naammagittaalliuuuteqartut, taassuma oqaatigaa:

- Inuit marluk oqaluttuarput kommunip allaffianukariarlutik naammagittaalliorsimallutik. Uangattaaq kommunimut naammagittaalliuuteqarpunga. Asfaltip atorneqartup suna ajoqutigineraa paaseqqaartinnagu aqquserngit asfalteererneqarnerat aatsaat nanginneqassasoq noqqaassutigaara, Gerda Vilholm oqarpoq.

Tasiilami aqquserngit pingajorarterutaat aasaq manna asfalteererneqarnikuupput, naallu innuttaasut naammagittaalliuuteqaraluartut kommuni maannangaaq iliuuseqarsinnaanngikkallarnerarpoq:

- Asfalteeriaatsimik Danmarkimi 1950-ikkut naajartulernerani atorneqarsimasumik Tasiilami ullumikkut atuisoqarneranut atatillugu naammagittaalliortoqartoq paasisinnaavara, Jan Karhof, Kommuneqarfik Sermersooq sinnerlugu Tasiilami teknikeri oqarpoq, nangillunilu:
- Allatut iliorsinnaanngilagut. Tasiilami aqquserngit iluamik asfalteererneqassappata, taava asfaltliorfissuarmik peqartariaqarpugut, tamannali massakkorpiaq ajornarpoq. Asfaltiliorfissuaq pilersinneqassappat, atortussat umiarsuarmiit nunamut usingiarneqarsinnaanngillat, umiarsualivik ullutsinni mikivallaarami, Jan Karhof oqarpoq.

Taassuma ilanngullugu oqaatigaa innuttaasut biilitik kommunip atortussiaateqarfiani salitsissinnaagaat.