Asbesteqassuseq ilisimaneqanngilaq

Asbesti kingumut eqqartorneqalerpoq, minnerunngitsumik Danmarkimi. Aamma maani nunatsinni, tamatumuuna Aasianni ilinniartut ineqarfiat pineqarluni, taama AG allappoq.

Angerlarsimaffitsinnimi asbesteqarnerpa, ilissinni uagutsinnilu? Inissiaatileqatigiiffiit nunatsinni annersaanut aperigatta akissutaa anorimi erfapporlusooq, Kenneth Jørgensenimi Inissiaatileqatigiiffik A/S INI-mi pisortaaneq ima oqarpoq:

-Nassuerutigisariaqarparput, asbesteqarneranik ilisimasaqaqqalaaqaagut, Kenneth Jørgensen aallartippoq.

Tassa imaappa sinerissami inoqarsinnaammat asbestitalimmi sianiginagu najugaqartunik?

-Aap, angertariaqarpakkit, tassami nalulluinnarparput illut isumagisatta sanaartorneqarnerminni sunik akulinnik sananeqarsimanerat. Imaassinnaavoq asbestitaqartut.

Sooq sianiginngilisiuk, ukiummi arlalinngortuni asbestip ulorianassusia eqqartorneqartuarpoq?

- INI-miuna isumaqarsimagunartugut, paaqqinnittarfinni, atuarfinni assigisaannilu sanaartukkani taamaallaat atorneqarsimasoq, inissiarsuarniunngitsoq, kisianni tassa inissiat nakkutigisatta asbesteqarsinnaanerannik misissuinigut maanna ingerlatilereerpagut.

Naatsorsuutigaarput ukiup matuma naanerani naammassissalluta, inissiaatileqatigiiffiup INI-p pisortaanera oqarpoq. Erseqqissaatigaalu kommunit inissianillu piginnittut allat suleqatigilluinnarlugit inissiat ataasiakkaarlugit teknikeriminnit misissorneqartut, amigaatai iluarsisariallillu nalunaarsorneqarlutik.

-Asbestimik ajornartorsiuteqartoqassappat suliassaq qanoq atsigisoq taamaalilluta paasissavarput, naatsorsuutigaara uuma ukiup ingerlanerani sineriak tamakkerlugu misissuisimassalluta. Kenneth Jørgensen naggasiivoq.

Asbesti 1950-ikkunni 60-ikkunnilu sanaartornermi atugaasimaqisoq kingusinnerusukkut paasineqarpoq inuup anersaartuutaanut qanoq ulorianartigisoq. Taamaalilluni sanaartornermi atorneqarunnaarpoq.