Asbest qanoq annertutigisoq atorneqarsimanersoq Namminersornerullutik Oqartussat paasiniarnialerpaat

apriilip 05-at 2007 17:00

Namminersornerullutik Oqartussat suli ilisimanngilaat pisortat inissiaataanni illuutaannilu asbesti qanoq annertutigisoq atorneqarsimanersoq. Asbestili qanoq atorneqarsimatiginersoq maanna paasiniarneqartoq, Ineqarnermut Pisortaqarfimmeersoq Ruben Svendsen, KNR-mut oqarpoq:

- Titartaasarfiutilik namminersortoq sulitipparput toqqorsivinni titartakkat misissortillugit – inissiani sorlerni, sumilu asbest atorneqarsimanersoq, illup iluani silataaniluunniit, asbestilu atorneqarsimappat sorleq atorneqarsimanersoq nalunaarsortillugit. Misissukkat aallaavigalugit nalunaarusiortoqassasoq Ruben Svendsen oqarpoq.

Qaammatit pingasut missaat qaangiuppata, nalunaarusiaq naammassippat, atorfillit iliuusissatut siunnersuummik suliaqassapput, politikerit naliliinissaminnut atugassaannik.

Ruben Svendsenilli erseqqissaatigaa inissiat kisimik sukumiisumik misissuiffigineqanngitsut. Namminersornerullutik Oqartussani inuk ataaseq sulisinneqarpoq toqqorsivinni atuarfiit titartagartaannik misissuitillugu.

Tassami Peqqinnissaqarnermut ataatsimiititaliaasimasup, pisortat suliffeqarfii tamaasa, kommunet, pisortaqarfiillu, 1986-imi peqqusimavai paasiniaqqullugu, pisortat suliffeqarfiini asbest sanaartukkanut atorneqarsimanersoq misissueqqullugit. Ullumikkulli paasinarsisimavoq taamanikkut misissuinerit inerneri katersorneqarsimanatillu ataatsimoorussamik nalunaarusiorfigineqarsimanngitsut.

Ruben Svendsenip tamanna ima oqaatigaa:

Susoqarsimanera pillugu taamanikkut nalunaarusiortoqarsimanersoq maannakkut qularnaatsumik oqaatigineqarsinnaanngilaq, taamaammat oqaatigiuminaappoq, taamanikkussamut paasigutsigu allakkatigut nalunaarusiaqanngitsoq, taava sumiiffiit assigiinngitsut ornillugit misissuisariaqassaagut, Ruben Svendsen Ineqarnermut Pisortaqarfimmi immikkoortortami pisortaq oqarpoq.

Danmarkimi pisortat inissiaataanni sanaartugaataannilu asbest qanoq atorneqarsimatiginersoq paasiniassallugit taamaatiinnarneqarnikuuvoq, Namminersornerullutilli Oqartussaqarfimmi titartakkat toqqortorneqarsimammata periarfissaqarluarpoq asbest qanoq annertutigisumik atorneqarsimanersoq paasiniassallugu.