Asbest: Peqqissuseq ernumassutigisariaqanngilaq

Atuarfiit pisoqqat asbestitallit nutarterneqalerpata, atuartut ilinniartitsisullu peqqissusaat ernummatigisariaqanngilaq.

Namminersornerullutik Oqartussanit taama nalunaaruteqartoqarpoq, Ilulissani Atuarfik Mathias Storchip siulersuisui atuarfiup 2009-mit ukiuni marlunni nutarterneqarnissaanut atatillugu atuartut ilinniartitsisullu atuarfimmiiginnarnissaannik ernummateqarlutik nalunaareersullu.

Kisianni asbestip pujoralaqarfiisa eqqaaniinnavianngillat, taama nassuiaavoq attaveqatigiinnermut ineqarnermullu pisortaqarfimmi immikkoortumi pisortaq Ruben Svendsen:

- Siullermik asbestimik piiaanermut tunngatillugu ilaatigut sulinermik nakkutilliisoqarfiup malittarisassiai malittussaavavut, tassa sanaartorfimmik assersuineq atorneqartussaavoq. Aamma atuarfik ataatsitut sanaajunngilaq, immikkoortitaarluguli sanaajulluni. Taamaalilluni atuarfiup ilaanut akornutaanngikkaluartumik asbestit piiarneqarsinnaapput, Ruben Svendsen oqarpoq.

Atuarfik Mathias Storch atuarfinni nutarterneqartussani kisiartaanngilaq, qularnanngilarlu atuarfiit nutarterneqartussat allat aamma asbestitaqassasut, isumannaatsuunissaq eqqarsaatigalugu pisortaqarfimmiit qanormita iliortoqarniarpa?

- Nutarterisoqassatillugu illuutit qanoq issusiannik nalilersuisoqaqqaartarpoq. Pisortaqarfimmilu isumaqatigiissutiginikuuarput nalilersuinermi asbesteqarnersoq immikkut maluginiarneqartarnissaa kissaatigigipput. Illumi qanoq ittumik asbesteqarpa, aamma qanoq ililluni piiarneqarsinnaava. Taamaalilluni peqqinnissamut navianartorsiortitsinnginniassammat. Nutarteriniarnerup aallartinnginnerani tamakkua tamarmik isiginiarneqartarput, Ruben Svendsen oqarpoq.

Atuarfiup siulersuisuisa aamma oqaatigaat atuarfik nutarternagu nutaamik atuarfilioraanni pitsaanerussasoq, tamanna qanoq isumaqarfigaajuk?

- Nutaamik atuarfilioraanni pitsaanerusumik atuarfittaarnissaq qularutissaanngilaq. Matumani nutarterinissamut 33 million koruuninik aningaasaliisoqarpoq taakkualu atorlugit nutaamik atuarfiliortoqarsinnaanngilaq. Nutarterinissarlu taamaatiinnarlugu nutaamik atuarfiliortoqarniarpat nunatta ilaani atuarfiit nutartigassat nutarternissaat kinguartinneqartariaqassapput, Ruben Svendsen naggasiivoq.

Atuarfik Mathias Storch pilersaarutigineqartutut 2009-mi nutarterneqarluni aallartissaaq, nutarterinerlu ukiuni marluni ingerlanneqassalluni.