Asbest nunarsuarmi atoqqusaajunnaarsinniarpaat

Asbestimik nunarsuaq tamakkerlugu atoqqusaajunnaarsitsiniarneq qanilleriarujussuartoq, Danmarkimi aviisi 3F allappoq.

Naalagaaffiit peqatigiit sulisoqarneq pillugu suleqatigiiffianni, ILO-mi, ilaasortat qanittukkut ataatsimiipput, ataatsimiinnermi nunani assigiinngitsuni naalakkersuisut, sulisartut kattuffissui sulisitsisullu oqaaseqaasiorput, oqaaseqaammi oqaatigineqarpoq asbestimik atoqqusiunnaarneq tassaasoq ukiut tamaasa nunarsuaq tamakkerlugu inuppassuit toqqutiginninnissaannik unitsitsisinnaasoq.

Nunani inerikkiartorfiusuni sulisartut annerusumik eqqarsaatigalugit pisariaqalersimavoq nunarsuaq tamakkerlugu asbestimik suliaqarnissaq inerteqqutaatilissallugu. Inerteqqut taanna nunani suliffissuaqarfiusuni 40-ni atuuppoq.

- ILO-p taamatut oqaaseqaateqarnera immaqa nunat ilaani soqutiginarpallaassanngilaq nunanili inerikkiartortuni oqaaseqaat taanna pingaarutilerujussuuvoq, BAT-imi avatangiisit pillugit siunnersorti ukiunik arlalinni asbestimik sammisaqarsimasoq, Lars Vedsmand oqarpoq.

Nuarsuarmi asbestiliortartut siuttuinut Canadamiut ilaapput. Asbestiliortarneq unitsinniarlugu tasamani naalakkersuisut sunnerniarneqarput.

Asbest ikuallannaveersaatitut atorneqarpoq, illup qalissiai oqorsaataalu taassuminnga akuneqartarput, soorlu aamma umiarsuit timmisartullu taamatut asbestimik ikuallannaaveersaasersorneqartartut.

Asbestip sananeqaataasa pujoralaasalu puaat sulineri sequtsertarpaat tamannalu toqussutaasartoq, ilisimatuunit uppernarsineqareerpoq.